【曾智華專欄】幾乎心臟病的馬主

我錯我錯我錯！本來估計潘頓上周三炮製一次「白果之夜」後，上周日會「回魂」，變回正常的冠軍騎師兼贏馬機器。結果⋯⋯可能佢食開白果有條癮，食到「心狠手辣」，非常「決絕」，上周日再食！跑馬就是這樣，好玩在贏錢時，大家以為自己英明神武，貼馬如神，目光如炬。

倒轉，輸馬也有「樂趣」，跑完馬，齊齊揸杯啤酒「哭馬喪」，罵呢個蠱惑、嗰個唔去，但永遠唔會認自己眼光差，輸錢其實抵死！前日晚飯，在座有位馬主「高B」，又係一講起「做馬主」，立時火都嚟，拉住小弟狂呻：「碌Sir，早前見你在專欄講一九九三年做馬主時嘔血經驗，我記得好清楚㗎。當時練馬師岳敦點你，話隻新馬『好易贏』未得，好生，先畀佢熱下身，唔使點落注。結果隻馬冷到六十八倍，但又唔係九十九倍，有點古靈精怪。然後安排殿堂級殺手騎師靳能策騎，入到直路騎法擺明搶錢，幾乎將匹打吡級數對手鍊低，輸馬頸而回，Q都派一千六百幾元！」

「嘩，犀利喎高B，唸書有冇咁叻？」

「鬼咩，因為你老哥的經驗，三十年後發生在我身上呀！」

高B乃Die Hard馬迷，長年發夢做馬主，終於去年夢想成真，二百幾萬元買咗匹新馬，操足半年上陣。本來諗住呼朋喚友入場威威，點知練馬師報告：「B哥，隻馬未得，呢場畀佢攞經驗，知道乜叫比賽先！」

咁講，邊個會瞓身？結果隻馬行圈時冷到一百零六倍，B哥信晒今場輸硬，買都嘥子彈，況且用的是包尾騎師，故只買五百元例飛。結果頂佢頭鎚，隻馬犀利到幾乎劏咗隻同場大熱！Q派一千一百元，問你死未？B哥幾乎心臟病發！

今晚買隻意頭馬「發財先鋒」啦！