【曾智華專欄】姜濤與潘頓

表演行業，總有明星、偶像，出台時享盡萬人歡呼，但回到台下，面對真實生活又如何？
　　
就我見證過不少的，四個字形容——苦不堪言！不過這是代價！
　　
例如明星及騎師，任何時間，都要Fit！明星不時上鏡，鏡頭會拉闊人，所以，你唔夠瘦，就會變「麵包」！元旦日人氣歌手姜濤復出，不良於行兩個月之後，哈哈，再出現，明顯圓潤晒！
　　
個別傳媒竟用「脹爆」形容，而且刻意選取最肥的角度刊登。其實眾所周知，姜濤本身就是個肥仔，只不過為做偶像而狂
Keep矣。
　　
一如當年欣宜簽下瘦身代言人合約，須經歷地獄式減肥，搞到外形根本不是佢，成個虛晒。終於合約滿了，覺悟了，立即做回自己。難得觀眾受落，如今事業攀到頂峰。
　　
講Keep Fit，其實最痛苦的是騎師，因多一磅半磅都唔掂，會損失大量坐騎，沒法騎輕磅馬。故此個個因節食搞到肌肉包骨，呢樣唔食得，嗰樣唔准食，連飲水都要控制。
　　
資深騎師早已過慣「非人生活」，部分叻到食完即刻入洗手間，將所有嘢由口放返出嚟！
　　
足球員也如是。所以，大家見到昔日Top Fit的星級如朗尼、大細哨、馬勒當拿⋯⋯全部退役後，立即「報復式」狂食，搞到變脹爆。
　　
冠軍騎師潘頓也經常為坐騎節食，最近傳出佢騎多一年掛靴，到時可大食特食喇。
　　
講到食，潘頓周三竟上演久久未見的「食白果」，連熱到一點六倍的「至尊高飛」都夠膽「死埋佢」，跑第五，所有彩池撻Q，問你服未？
　　
明日應該「回魂」喇啩，否則博拉咩？我睇好「八駿巨星」及「縱橫天下」。前者為告仔馬，潘頓唔敢遊馬河，後者為何良好馬，上次佢Easy Win，繼續霸住，必定有分在手！