【曾智华专栏】物有/冇所值练马师

任何专业，看台/市场要求的是成绩，是表现。尤其竞技场，百分百英雄地，冇人会讲同情，更冇人理你背后有几勤力，一切只问结果（是否特首口头禅——以结果为目标？）！
　　
马圈当然百分百如是，无论练马师或骑师，讲到自己会飞都冇用，识唔识赢马先？
　　
更重要，个个会问，你是否物有所值？早年小弟养过团体马，练马师岳敦认为要请海外顶级高手靳能做主帅，就此，全部厩内马主，人人平分费用。老友，绝对唔平㗎！
　　
不过，当时个个心谂——有马赢咪得囉，收到啲奖金，应够冚返条数啩？结果，哈哈，学咗Wishful Thinking两个英文字！因输下一场，输下又一场。钱就个个月夹，马就唔多会赢。最弊，既然靳能得主帅，马房所有出赛马，必须优先用佢骑，惨在甚少机会拉头马，马主当然嘈到拆天，纷纷扬言拉仓！
　　
讲返今季，睇睇各个马房列出的养马费，二十二个马房，全部收费不同。奇过蒙太奇，原来马主畀马房的费用，绝不与成绩成正比！当中最荒谬为苗礼德，收每月六万五千二百三十元，排第三位，与冠军练马师蔡约翰看齐，不过⋯⋯冇眼睇，佢赢马数字则排在二十二位，即包尾大幡！咁嘅表现，收咁嘅价钱，难怪拉仓频频矣。收费最贵边个？新开仓的黎昭升！暂时亦是物冇所值，排第十七位，但赢得的奖金则是尾二，即只胜低班赛事。
　　
咁最抵边个呢？登登登凳！讲都唔信，正是排第二、奖金最多的告东尼！收费排十九位，平到飞起。另一位狂超值的是吕健威，差不多最平！呢两个马房，真系想唔爆仓就奇，简单，若你系马主，会点拣？
　　
明日元旦大赛马，最有看头当然为三级赛「华商会杯」，跑千四米，有几匹明星马在阵。
　　
度来度去，我决定选今季仍未胜出的「美丽同享」，此程战积极劲，上季两W一Q。今季跑咗四场，看似表现普通，实质愈来愈到位。上场跑一级赛第四，今次回师三级，着数晒，起筷系时候喇老友！