【曾智华专栏】「自然力量」与「转跑道」

周二小弟贴士又再「中规中矩」，只畀一只「自然力量」，W出有近四倍，似乎有少少超赔率。正如当日本栏指出，呢场部署非常易拆局，就是姚本辉出一只高分重磅马「总理」，目的是要令另一匹旗下马「自然力量」可以孭最轻磅上阵。结果一如所料，清风送爽，在毫无难度下弹离胜出，摆明Sure Win。希望日后再有这类明刀明枪「派钱马」就正嘞！
　　
近期有个现象，令人不快，为弱势骑师全面被冷落，佢哋再磨下去，根本是浪费青春！
　　
周三九场马，有三位骑师并非停赛，但竟然一匹马也无得骑，包括：黎海荣、巫显东及黄皓楠。点解会搞成咁？马会高层又点睇呢个现象？会否任由其继续呢？
　　
事实，今季以上三位骑师，加埋黄俊，四个表现相当不堪，尤其「大师傅」黎海荣及巫显东，骑咗接近半季，竟然连一只头马也冇，究竟搞乜鬼？
　　
骑师可能呻：「都冇好马骑，点可以有W㖞。」
　　
咁问题嚟嘞，个个马主及练马师都想赢马，若你骑功得，为乜唔畀你骑，而要配潘顿、何泽尧、布文或田泰安？尤其潘顿，少少机会都热过火屎，若任何冷门骑师有少少机会，计计值博率，当然列入考虑，点会Say No呢？
　　
Say No，正正因马匹畀你骑，绝大机会误于庸手！喂，若之前领过嘢，一次两次三次后，咁就儍嘅先会畀马你博啦吓嘛？你估马场系善堂乎？
　　
其实策骑乃一个表演行业，有料、冇料及有冇天分，一落跑道就知。唔使资深嘞，普罗马迷也会个个有眼见，根本上，本土的黎海荣、巫显东、黄俊及黄皓楠表现完全唔及格，外籍的波健士、麦利奥及马雅，也不应发牌，因太水皮了。有佢哋在，拉低晒竞赛水平！
　　
小弟忠告，唔够班的本土骑师，快快「转跑道」，改做助理练马师或骑马人吧。再磨落去，也是浪费时光，最终被人请走，冇晒瘾㗎！
　　
明天沙田赛事，我提供一只长途马，布文骑贺贤的「健康马」，二千米为其强项，起筷！