【曾智华专栏】江湖救急借两嚿半

昨日中午，在油麻地百老汇电影中心睇完《圣诛》（近期有深度、极吸引的精采伊朗片，影迷万勿错过，女主角已夺得今届康城影后），肚仔饿饿，于是踱去宁波街粥品专家「新兴栈」，叹番碗鱼腩粉肠粥。
　　
呢档粥有近六十年历史，老板当然是地胆，兼且乜嘢人都见过，知点应付。
　　
点解我咁讲？因油麻地一带龙蛇混杂，道友黑社会妓女……三山五岳人马满布，你冇多少江湖伎俩，在此开门做生意？单单应付轮流上门勒索的古惑仔，已经够你头痛。
　　
应付上门勒索的烂鬼，小弟也略有经验，不过是几十年前的事了。班友的手法五十年不变，冇乜随时代及科技而「改善」。
　　
最懒的，就是逐家铺问：「老板恭喜发财，兄弟手足要开饭，唔该方便一下！」
　　
佢哋当然不会蠢到话明勒索，只会隐晦，总之你一定明。绝不会明目张胆恐吓：「唔畀保护费就淋你红油，搞到你鸡毛鸭血，冇人敢帮衬！」
　　
我试过，斗零唔畀！结果一开门就好生意到「你唔信」！成队黑衫金毛汉操入店坐低，个个只叫碗净面，然后大大声炒虾拆蟹，磨烂蓆唔走。佢哋有冇犯法？冇！
　　
又或者，不停上门话提供服务，例如洗枱布。正常收十蚊张的，佢哋就扬言洗得特别干净、特别靓，故要收二十蚊一张。所有「服务」有齐单据，你根本吹唔胀，难道咁都走去报警乎？
　　
所以应付古惑仔，必须有一套「平衡术」的，今日无谓在此爆嘞。不过，到咗今天，有晒先进科技，就容易搞啲。因为几十年前录影录音设备落后，又冇闭路电视，所以，边个嚟搞你，靠认样，烦！
　　
今天有晒CCTV，你嚟搞我，由门外到门内，全部真样、讲过乜皆录低，有乜事可作呈堂证供！
　　
讲返「新兴栈」老板，日日面对不少烂鬼。我食粥当日，就有金毛佬烂佬大声嗌：「老板，江湖救急，借两嚿半唔该！」（借啫，冇犯法！）
　　
老板回应：「冇！」然后指指闭路电视。烂鬼立即冇瘾离开。不过，呢种方法，行十家中一家都好和味！