【曾智華專欄】先有結果再做調查

大家睇見今日標題，會否衝口而出：「喂，有冇搞錯？好似調轉咗喎！點會咁㗎呢？」
　　
對！普通邏輯，當然是先做調查，再有結果。不過，騎騎，舉世的調查，無論是商業的、政治的、政策的……以至民意傾向的，十之七八都不會客觀中立。多數睇睇邊個出錢做調查，然後「專業調查機構」就會度身訂造問卷或提問方式，直接或間接將結果導向到主辦調查者的意向或利益所在。
　　
其實資深傳媒人無不知道這種伎倆，但很奇，凡見到記者報道「調查」，多只照收到的資料報，甚少挑戰調查結果是否充滿偏見及問卷是否充滿引導性，從而削弱其可信程度。
　　
以前做電台，小弟對所有政黨做的調查，提都唔提，因一提就影響自己智商！「喂！咁嘅結果你都照讀，究竟有冇腦㗎？」此乃心中自責！
　　
上周香港吸煙與健康委員會公布一項「調查」，結果指出，若要有效推動戒煙，政府應大幅增加煙草稅百分之百，並再年年加碼，兼且規定零售價去到一百元一包。若如此，百分之六十七的煙民或會考慮戒煙。
　　
嘩嘩，百分之六十七？好高效啫。加煙稅既然可變「禁煙」，咁點解唔加夠十倍、一百倍、一千倍？如此，咪可趕盡殺絕囉。假若只加一倍稅，又或者將香煙規定一百元一包，即變相將吸煙「貧富不均化」、「貴族化」、「特權化」，再者必大量鼓勵私煙「普及化」，完全不是一個公平的政策。
　　
說來，全世界包括特區政府，對處理吸煙政策都非常矛盾而偽善。一方面力指吸煙危害健康，故不准宣傳，更強逼煙商將最惡心的圖案印在煙包面，以圖嚇退煙民，又年年強調公共醫療花在醫治煙民方面，是天文數字。
　　
但同一時間，又拒絕對香煙視為有毒物品，完全禁絕。只一方面勸人唔好吸，另一方面就大抽特抽煙稅，養肥庫房。咁矛盾，邊有人服？
　　
對，每個機構都有其「使命」，吸煙與健康委員會也如是。不過，我認為對佢哋發布的調查，根本毋須認真處理。