Showtime

資深傳媒人期待兩個月的《快樂傳媒老是佛慈善晚會》，叮，今晚開波！

小弟的設計，其實只是玩玩下。但原來個別老是佛退休後，長期冇試過面對咁多自己友表演，故心情難免忐忑，恐怕上台前個心卜卜跳，跳咗入口。

唔怕！有小弟主持大局。邊個發台瘟，立即頂住，搞到發完為止。

上周飯聚，各自報告五分鐘講乜？有乜吸引？大家互相踢「橋」過程，已經笑死人冇命賠。其中幾位內容肯定過癮！包括：

一、「輝哥」吳錫輝講當年搵命博，才搞掂關正傑肯唱「永恆的勵志歌」《一點燭光》。點解嚇到心到離兼冒生命危險呢？佢今晚爆完，小弟再公開好了。總之，當年我哋班友做嘢，百分百「以結果為目標」，連命仔都可以唔要！

二、氣勢新「張文新」爆「四大天王」點嚟嘅！幾名當年仍未爆紅的歌手——劉德華、張學友、郭富城及黎明，原來能夠誕生，與國際巨星史泰龍有一段淵源。等新哥講啦！

三、「何老大」何定鈞，早年是TVB的「低調靈魂」，經歷N個朝代，所知的電視圈極高層內幕，比香港任何人更多更堅！尤其後來曾做到兩人之下（邵逸夫、方逸華）、幾千人之上。究竟佢眼中的邵爵士及方小姐是甚麼人呢？爆得幾多就幾多啦。總之，多次飯局聽聽埋埋，我都凸晒眼！

四、「廣告神童」（如今已變神叔）潘啟迪，上世紀七十、八十年代，見證廣告業最輝煌時期。不少膾炙人口的經典口號，佢都有分協助出世。例如令維他奶業績飛升的一句——「點止汽水咁簡單」。原來到入錄音室前，唔係咁㗎！結果被一個猛人去廁所時路經聽到，改咗一個字，立即點石成金。究竟邊個猛人？改咗邊隻字呢？

五、「曹口仁」（即粗口人！）鄭明仁及「型佬燦」羅燦，分別做過已消失的報章老總及社長，佢哋所知所經歷的，夠晒刺激。

人人問點講得晒呀？講唔晒？咪搞多幾次，為更多慈善機構籌款囉！