Showtime

资深传媒人期待两个月的《快乐传媒老是佛慈善晚会》，叮，今晚开波！

小弟的设计，其实只是玩玩下。但原来个别老是佛退休后，长期冇试过面对咁多自己友表演，故心情难免忐忑，恐怕上台前个心卜卜跳，跳咗入口。

唔怕！有小弟主持大局。边个发台瘟，立即顶住，搞到发完为止。

上周饭聚，各自报告五分钟讲乜？有乜吸引？大家互相踢「桥」过程，已经笑死人冇命赔。其中几位内容肯定过瘾！包括：

一、「辉哥」吴锡辉讲当年揾命博，才搞掂关正杰肯唱「永恒的励志歌」《一点烛光》。点解吓到心到离兼冒生命危险呢？佢今晚爆完，小弟再公开好了。总之，当年我哋班友做嘢，百分百「以结果为目标」，连命仔都可以唔要！

二、气势新「张文新」爆「四大天王」点嚟嘅！几名当年仍未爆红的歌手——刘德华、张学友、郭富城及黎明，原来能够诞生，与国际巨星史泰龙有一段渊源。等新哥讲啦！

三、「何老大」何定钧，早年是TVB的「低调灵魂」，经历N个朝代，所知的电视圈极高层内幕，比香港任何人更多更坚！尤其后来曾做到两人之下（邵逸夫、方逸华）、几千人之上。究竟佢眼中的邵爵士及方小姐是甚么人呢？爆得几多就几多啦。总之，多次饭局听听埋埋，我都凸晒眼！

四、「广告神童」（如今已变神叔）潘启迪，上世纪七十、八十年代，见证广告业最辉煌时期。不少脍炙人口的经典口号，佢都有分协助出世。例如令维他奶业绩飞升的一句——「点止汽水咁简单」。原来到入录音室前，唔系咁㗎！结果被一个猛人去厕所时路经听到，改咗一个字，立即点石成金。究竟边个猛人？改咗边只字呢？

五、「曹口仁」（即粗口人！）郑明仁及「型佬灿」罗灿，分别做过已消失的报章老总及社长，佢哋所知所经历的，够晒刺激。

人人问点讲得晒呀？讲唔晒？咪搞多几次，为更多慈善机构筹款囉！