张家辉自嘲做导演攞嚟衰难揾投资者 主流电影大把人拍钟意拍冷门嘢丨独家
张家辉跟内地导演兼演员马浴柯继《怒潮》后，再合作电影《重生》，对于日后再执导可邀请马浴柯演出时，拍开非主流电影的家辉就大呻揾投资者好难，翻查资料，由家辉执导的2018年的《低压槽》及未上映新作《赎梦》，两者相隔至少6年，难怪张导演玩自嘲，「投资梗系买商业片，点会买我𠮶啲吖！」采访：杜杜 摄影：罗安强 发型: Wong tak chau(黄德洲) 化妆: Midco chu(朱惠芳) 场地:apm
马导跟家辉早在2013年《扫毒》结缘，分别演毒犯及警察有不少对手戏。去年马导首部自编自导自演电影《怒潮》，创作阶段已想到家辉，但坦言冇信心可以请得郁对方。「后来经投资人帮忙，家辉哥看了剧本还记得我，两天时间就说『帮你啦』。」
合演《扫毒》已互相欣赏
家辉在《扫毒》时已对马导留下好印象，「佢演『段坤』，真系耶稣都留佢唔住（戏中经典对白）！」所以当被邀拍《怒潮》时便认真考虑，「首先知道呢个人系好认真嘅演员，直至有部戏话佢自己写。」家辉更自爆收剧本后爽快答应，「我唔系𠮶啲，你畀咗剧本我，我又唔睇住，然后你问我，我话近排好忙未睇晒，唔知点等你好，其实睇剧本只用你两个钟，唔睇就一个礼拜都唔睇啦！」家辉亦睇准马导对内地巿场认知的优势，「我都想同多啲新导演合作，希望佢哋有新想法，尤其是马导系演员，喺内地打滚咗咁耐，相信佢会更了解内地观众，想睇套乜嘢嘅犯罪动作片。」
由于《怒潮》成绩不俗，马导创作《重生》时完全为家辉度身订造，「将家辉哥、小天（阮经天）、陈国坤和自己的照片，贴在黑板上对住来写剧本。」马导延续这班底全因价值观一致，「我们的审美观很像，他们在现场不理吃得饱不饱好不好，拍的时间久不久，为电影好的事家辉哥都做，这样的搭档特别难得，会很珍惜。」家辉谓《怒潮》合作愉快，跟马导很啱倾，所以二话不说就答应演《重生》，「拍摄《重生》时，佢唔单止拍得更好，系更加了解要畀乜嘢元素去吸引观众，观众好接受。」
家辉更开心票房报捷，「戏嘅嘢梗有赞有弹，我哋整体成绩好理想，有大戏上映我哋追紧上去，追到过埋《异形：罗穆卢斯》成单日票房冠军㖞！之后继续攀升紧，就算有10几部新戏上，都仲企喺几理想嘅数字上。」问到成功因素，家辉就搞笑话有同马导讲过，「但唔可以喺度讲，系我哋变魔术嘅秘密，哈哈！」然后又笑住教马导点答，「话我哋好彩啫，呢个期间冇乜犯罪动作片！」
角色造型够爆过足瘾
家辉的角色有2个身份，自言拍过唔少剧情动作警匪片的他依然觉得有新鲜感，「角色咁放肆，好有挑战，我觉得好玩！」对于「沙旺」造型，更加觉得过瘾，「佢外形癫，行为癫，但原来佢又系假装，真正身份唔系咁样，喺呢条线上面，空间比较大，最钟意喺差馆成个流浪汉嘅造型。」造型亦令他更能放开去演绎，不再理会是否反派，「好难计系好人、卧底，不如演活咗个坏人先，要好保留咁扮个坏人，咁咪失败囉！」马导今次演的「巴莱」是非一般奸角，是他刻意为自己安排，「我做演员时冇人信我能演好人，所以今次安排自己做好人，但冇信心一嚟就做好人，所以畀个反转，呢个效果就好啲。」
既然两人合作得开心，问家辉再做导演时，会否邀马导当演员？家辉斩钉截铁话会，马导开心回应：「我想呀！」不过家辉表示他通常拍冷门题材，所以开戏有难度，「我同佢（马导）分别，就系佢系创作成功商业题材电影嘅导演，而我做导演就系咁衰，拣啲非主流嘅嘢，开得成嘅机会难过佢。」马导又要求家辉揾他演好人，家辉都一口答应，同时又好感叹：「我啲戏都多数讲好人，但呢啲戏好难开，投资方梗系买佢𠮶啲商业片，点会买我𠮶啲吖！」