关楚耀激赞老婆甘心被收服：好似入咗邪教 做咗人夫洗衫煮饭揽晒上身丨独家
去年11月，关楚耀与网红Joann结婚，已为人夫的他坦言责任感大咗好多，𠵱家会落手落脚洗厕所、洗衫、洗碗。对于老婆不满被网民抨击结婚妆容似鬼新娘于网上还拖，阿关即肉赤护妻：「老婆唔系发火，只系做返自己回应两句啫。」他更大赞新娘子永远系最靓，力撑Joann嘅新娘妆冇问题。采访：方骞平 摄影：罗安强 场地：Hotel ICON The Market
关楚耀和林景程于刚播完的剧集《法证先锋VI︰幸存者的救赎》获好评，被封《法证》男版Twins，阿关坦言依依不舍「冼阳医生」，对演戏更越来越有兴趣：「由《法证先锋V》恐怖情人『董应伟』到《一舞倾城》富二代『Marco』得到好大回响，既有满足感仲可以发泄内心阴暗面，好好玩。」
撑老婆反击网民
阿关最感激老婆从旁畀意见，及时制止他因为伤患想辞演《一舞倾城》，阿关好似参加咗赞赏老婆大赛，对Joann赞不绝口：「佢除咗系我老婆，仲系我导师、朋友、兄弟，有多重身分，唔开心时开解我，总之同佢一齐感觉舒服好开心，佢唔止对我好，仲冧得掂我超级难搞嘅妈咪，拍拖咁耐未遇过好似我老婆咁嘅女人。」做咗人夫，平日形象好Chok的阿关学识买𩠌煮饭，洗厕所、洗衫、洗碗及抹地，「总之乜都系我。」问到是否被老婆完全收服？他即笑出声：「哈！又唔好咁讲，系我愿意嘅，不过，我做直播时同网友讲我系入咗『邪教』，可能内心系犯贱。」
对于Joann不满被网民抨击结婚妆容似鬼新娘于网上还拖，阿关轻松笑说：「佢心中成日会有团火，但做返自己。」又称眼中新娘子永远最靓：「当日佢结婚妆好靓呀，冇问题㖞，冇所谓啦。」不过，阿关坦言较欣赏老婆素颜，感觉最舒服：「佢同班姊妹出去打卡梗系要化妆着好啲啦，要睇场合嘅。」成个访问，阿关唯一扁嘴位就系投诉老婆只准他做人肉脚架，「佢弹我影啲相唔啱佢口味，我假假哋都系摄影师，开过摄影展㗎。」