《长腿》 唔好带脑入场 丨头条戏场

好记得年初，独立电影制作公司Neon公开《长腿》首支宣传片，当时未有电影名，片中只有一张陈年家庭照及一张案发现场相片，相中是一位小妹妹的下半身，片段中至尾声是令人心寒的报警录音， 一个男人好急速咁话，「佢唔系我个女」。《长腿》于美国上映后，外国影评盛赞「近10年来最恐怖电影」，烂蕃茄又有100%好评、IMDb亦有8.3高分，Marketing真系好重要，你唔系唔入场呀?不过观众反应好两极，有人弹终极烂片，有人赞不可多得，观影期间我只系觉得好不安，好压抑，如果你本身已经好压抑，可能要谂清楚先好入场。(上映中) 撰文:廖思慧
 

横跨30年的连环灭门谋杀案。

 

呢张就系首支宣传片的陈年家庭照，全家死晒。

 

首支预告重要资讯，只见小妹妹下半身的相片。

 

谋杀案中杀全家的一家之主。

 

宣传恐怖片，10部有8部都话自己史上最恐怖，习惯就好，唔通话其实唔惊㗎，全部用声效呃你咋，咁咩?《长腿》恐怖之处唔系因为Jump Scare，其实失惊无神吓鬼你场口唔多，一只手数得晒，亦唔系因为血腥，系全片都有种令你毛管戙的不安感，即系个Vibe好邪恶。

Lee Harker越查越唔对路，发觉「长腿」跟自己有关，好崩溃。

 

「长腿」嘅信附上大量古怪图案，但Lee Harker都查到出嚟。

 

佢就系欣赏Lee Harker有第6感的上司，命令对方查连环谋杀案，自己都出埋事。

 

第6感查案大晒
导演Osgood Perkins父亲是经典惊悚片《触目惊心》中，饰演有恋母情意结的变装癖杀人犯，已故演员Anthony Perkins，做仔嘅都踏足电影界，先做演员后转型导演，拍亲都系恐怖片，不过导演自称从来唔睇当代恐怖片，留意返系当代。《长腿》故事以90年代发生的一系列离奇连环杀人案开始，因为有超强第6感，FBI探员Lee Harker（Maika Monroe饰）奉命调查连环杀人案，叫得连环当然唔只一单，案件共通点都系死全家仲要系老窦杀女，而个女咁啱都系14号生日，然后命案现场都会有一张署名「长腿」的奇怪图案信件。

Lee Harker阿妈，丧嘅，长期情绪勒索个女，仲有好多秘密。

 

手作娃娃系重要角色，估佢唔到。

 

全套戏最癫一幕。

 

呢间系Lee Harker间屋，屋中白衫嘅就系「长腿」。

 

Lee Harker的童年，原来已见过「长腿」。

 

因为第6感，探员Lee Harker觉得系咁就系咁，明知连环杀人犯在某间屋，有探员死咗，依然唔Call支援单拖冲入去，好多位都睇到嬲。加上「长腿」跟邪教有关，第6感加邪教，所有冇逻辑的事都立即变得有逻辑，不过本文条题已经讲得好清楚，「唔好带脑入场」，大家请记住呢个初心。全片弥漫好多恶，包括邪教的恶及原生家庭之恶。特别要赞导演用冷色系拍摄的画面好靓，睇恐怖片睇到睇展览咁，至于金像影帝尼古拉斯基治，出场唔多，好彩咋。

Lee Harker同「长腿」终于见面，呢个镜头好正。

 

 

佢系尼古拉斯基治，系邪恶嘅轴心，把声好衰。