星8卦丨「勇仔」後生捱壞身體頻頻大病連累蝕大本坐冷板

雖然好多時覺得自己仲得嘅，但做娛樂圈想紅，就一定要博，係後生嗰陣搞壞身體唔多覺，去到咁上下年紀問題就陸續出嚟，真係點都補唔返。

好似「猛男」同「勇仔」兩個出咗名唔錫身，「猛男」有次意外搞到大家以為佢唔再企得番起身，但憑住好堅毅唔忿氣嘅性格，而家好似無事人咁，仲好多搞作，知情嘅人都話佢係死頂，其實成副偈係壞嘅。但點都唔夠「勇仔」誇張，呢幾年大家仲係好鍾意佢，總之一出嚟做乜都賣過滿堂紅，總之有「勇仔」就唔使窮，乜嘢都係賺錢嘅！

可惜博殺一段時間後，之前已經壞咗嘅身體發出警號，三時五刻都病到起唔到身，最慘係好多地方簽咗約，收晒人錢，之前乜情況都賺足100%，而家呢，賠錢賠到驚，每次job連50%盈利都無，幫佢做主辦嘅直情覺得去咗賭場玩大細，唔知博唔博得過。於是「勇仔」而家個朵掟出嚟，以前人人爭住一齊合作，而家完全無人問津，都話叫佢好好休息，唔好滾搞大家，費事錢未袋穩已經要嘔凸做蝕本生意。