星8卦丨「勇仔」后生挨坏身体频频大病连累蚀大本坐冷板

虽然好多时觉得自己仲得嘅，但做娱乐圈想红，就一定要博，系后生𠮶阵搞坏身体唔多觉，去到咁上下年纪问题就陆续出嚟，真系点都补唔返。

好似「猛男」同「勇仔」两个出咗名唔锡身，「猛男」有次意外搞到大家以为佢唔再企得番起身，但凭住好坚毅唔忿气嘅性格，而家好似无事人咁，仲好多搞作，知情嘅人都话佢系死顶，其实成副偈系坏嘅。但点都唔够「勇仔」夸张，呢几年大家仲系好钟意佢，总之一出嚟做乜都卖过满堂红，总之有「勇仔」就唔使穷，乜嘢都系赚钱嘅！

可惜博杀一段时间后，之前已经坏咗嘅身体发出警号，三时五刻都病到起唔到身，最惨系好多地方签咗约，收晒人钱，之前乜情况都赚足100%，而家呢，赔钱赔到惊，每次job连50%盈利都无，帮佢做主办嘅直情觉得去咗赌场玩大细，唔知博唔博得过。于是「勇仔」而家个朵掟出嚟，以前人人争住一齐合作，而家完全无人问津，都话叫佢好好休息，唔好滚搞大家，费事钱未袋稳已经要呕凸做蚀本生意。