星8卦丨「乖巧」人前人后两个样埋怨公司推job错失攞奖机会

人真系不可以貌相，初时人人都对「乖巧」非常有好感，觉得有礼貌又斯文，原来只系表面，骨子里其实好阴湿同计算。亦因为表面嘅感觉，令到「乖巧」嘅星途一直都顺畅，近年直情系无人可以争嘅情况下，归纳为演技派𠮶一类。

可能因为顺利咗，真本性终于蒲头。话说有次公司同事嘅朋友结婚，话系「乖巧」嘅粉丝，于是同「乖巧」讲可唔可以录一条贺朋友大婚嘅片作为礼物，「乖巧」梗系一贯做好人，好呀，你等我一阵，而家未得闲。点知转个头同事嘅上司就走嚟同佢讲，你做乜走去骚扰「乖巧」，佢话你畀麻烦佢，因为三唔识七，做乜要帮佢忙，搞到同事唔开心又尴尬。

自从有咗啲名气同被评价后，「乖巧」就变得更加串，以为自己真系前途无限，开始埋怨公司唔帮佢接之前𠮶部好戏，人哋唔使点做都攞埋奖，而制作组方面第一个系揾佢，但各方面衡量觉得佢唔啱做。而家口碑咁好，「乖巧」觉得系公司拖累咗佢，所以日闹夜闹，话成班人都系废嘅，无眼光。相关人士亦唔可以话乜嘢，但个心就嬲到话放长双眼，睇佢可以红得几耐，人品咁差，唔行得远嘅！