关嘉敏签TVB遭洗版2年闹反骨匿埋喊 入行8年靠扮谭辉智登热搜榜第一吓亲
29岁的关嘉敏（Carman）在TVB综艺节目《福禄寿训练学院》中神还原《梦中人》的王菲；又女扮男装变身《屈到病》「痰辉智」，扮嘢扮到上晒身登上「人气热搜」榜首，入行8年第一次。对于3年前，参加完ViuTV《全民造星3》后加盟TVB，被插「反骨无情」闹足两年，又撞正祖母离世，Carman当时有苦自己知，只能匿埋屋企喊。家阵贵为扮嘢新一代，已非二打六的Carman，自信满满咁话：「有能力嘅人去边度都会发光！」采访：方骞平 摄影：罗安强 场地：Amelia@海运大厦
关嘉敏在《福禄寿训练学院终极对决》中，学足谭辉智(FC)唱歌时的扭曲表情和嘴形，再配合机械式舞步，䁽眼望以为系本人，最搞笑连FC仔女都以为系爸爸。原来Carman扮FC有段故：「我好佩服李思捷嘅眼光，我曾提出扮肥妈、周秀娜、朱咪咪等，有晚佢望住我张相3粒钟就叫我试下扮佢(谭辉智)，而王菲都系佢叫我扮，我信佢。」
想谭辉智着裙扮阿妹
从未扮过嘢嘅Carman绞尽脑汁演出，逐格重温FC唱《屈到病》及其访问动态，她笑说：「感觉突然好熟悉呢个人，好有亲切感，(做咗佢Fans？)我又唔够拉姑撼呀，不过，如果可以合唱及一齐拍剧就好喇。」Carman仲有好多鬼主意，「既然FC都话我哋咁似，我哋可以演兄妹，由佢做哥哥或者戴假胸、着裙反串扮阿妹，咁样好有喜剧效果，但佢始终系爸爸身份，唔知肯唔肯。」Carman曾是女子组合BINGO成员，出道8年只出过团歌未有Solo，故好恨有自己作品：「多年来Keep住有练歌，从来冇放弃过，唔想因为拍剧及做综艺失去初心，期待乘势争取唱歌机会。」因为扮嘢扮出个未来，Carman觉得好惊喜：「入行咁耐，就算我点畀心机日日跳舞，甚至着泳衣都上唔到『人气热搜』榜首啦，更何况唔系『衰嘢』(负面嘢)，所以见到反应咁Hit都呆咗。」
由天堂跌落地狱好惨
2016年，Carman加入天盟娱乐成为女团队长，收过只得8毫子嘅粮单。至2020年参加ViuTV《全民造星3》10强止步，人气急升成功「脱贫」，可惜无以为继。2021年加盟邵氏揾机会惨遭网民声讨，闹足两年「反骨妹」。时隔3年已放下，「唔谂好耐喇，唉！当年俾人闹爆，有成千个批判留言，最唔开心责怪我反骨，演艺圈已经好少机会，佢哋当然唔会理解我感受，所以真系好无助好崩溃，最惨前几个月仲好哋哋接job，人气突然插水式下滑，接受唔到囉！咁啱同日祖母『走咗』，唔通仲同家人讲我有几唔开心咩？当时真系好辛苦，匿喺屋企喊足3日3夜，乜都冇做过。」
剧情需要可大胆演出
Carman庆幸好快企返起身，「去向由公司决定，除咗做好自己外，根本冇嘢做得到。」之后佢奉行「每次做嘢都唔好令自己后悔。」宗旨。另外因为被插足两年，Carman已刀枪不入，更认为有能力嘅人去边度都会发光！「要做有能力嘅人就要不停增值，我畀心机学话剧、功夫、打鼓、甚至射箭，想试多啲新嘢，会有多啲发挥。」已装备好的Carman，期待做个全能艺人，拍剧、出歌、返内地做综艺节目，甚至剧情需要，唔介意大胆演出。