即時娛樂
2024-08-26 21:03:40
星8卦丨「霸道」心計重逼走同門做一姐 嫁入富門無錢駛重出江湖?爆
「霸道」 成世人都鍾意爭，以為簽到好東家，諗住做一姐，喺公司用盡媚功搞掂「大佬」，將有咁上下份量嘅同輩都逼埋牆邊。首先梗係「同鄉」，由於性格比較內斂，「霸道」成日叫「大佬」將啲大 Job派畀自己，「同鄉」論人氣同才華都比佢好，所以「同鄉」越嚟越鬱鬱不得志，要搵碼頭轉，雖然而家個老闆對佢都唔錯，但唔見得當佢係寶，所以情緒上有鬱結。
相關閱讀：星8卦丨「純品」錯愛「怪人」被分手 用附屬咭支持靠「怪人媽」
「細妹」 仲慘，一直被視為重點栽培，因為有啲才華，啱啱冒起就畀「霸道」撳到實，仲要玩埋雪藏真淒涼 。自從識咗「有錢仔」，「霸道」見男人咁大生意，就無心再爭，諗住湊掂男友唔使做，而且三扒兩撥就結埋婚，仲要神神秘秘，從此佢就被封咗個花名叫「十不做」，公司叫佢做乜都推，話以家庭為重。婚後至知「有錢仔」追自己嗰陣已經叫闊佬，但送過啲乜真係唔多矜貴，「霸道」諗住做埋老婆就一定可以分佢身家，喺今日有錢男人唔太多嘅情況下，呢個筍盤都要mark住 。
點知原來做咗老婆反而更加唔畀錢駛，仲叫佢要慳啲，因為市道唔好，最近亦蝕咗好多錢。「霸道」 之前諗住收山嘅態度即刻180度轉變，而家日日返公司蒲頭，雖然係人哋老婆，但對「大佬」狂施媚功，始終一場舊相好，所以都叫大家搵啲好嘢畀佢做，加埋公司畀佢搞走嘅都唔少，唔畀返佢做一姐都冇得揀啦！
其他文章：
星8卦丨「嬌嗲」「阿仔」真心相愛結良緣 奶奶變態行徑破壞夫妻關係
星8卦丨「高大媽」阻住阿仔拍拖出奇招 冷飯菜汁招呼「花旦」終分手
星8卦丨「忠心」嫁人被逼增肥扮醜 「高大」大男人真身暴現新婚變分居