雲浩影與歌迷慶生獲贈米線型蛋糕 剖白內心世界感觸落淚：想令「迷雲黨」感到自豪

雲浩影（Cloud）日前與60位被抽中的幸運兒開Party慶祝生日，「迷雲黨」（Cloud粉絲暱稱）精心布置場地，門外擺放Cute爆的「小雲」人形紙牌迎賓，Cloud見狀興奮得嘟嘴打卡，非常可愛。場內還展示大量Cloud的靚相，更設有「心事貼貼貼」展版，供「迷雲黨」寫下心底話。此外，「迷雲黨」更精心準備了米線造型的生日蛋糕，Cloud笑說：「因為我TG（Telegram）個名叫『最愛食米線』，我本人亦都好鍾意食，蛋糕上面仲有牛肉、魚蛋、墨丸同金菇。」驚喜一浪接一浪，「迷雲黨」再為壽星女送上天使造型的「雲寶寶」公仔，Cloud愛不釋手說：「『雲寶寶』係迷你版嘅我，佢有唔同嘅衫可以換，最重要係佢個Pat Pat好翹，有做運動嘅，好搞笑。」

在完成「大電視」遊戲後就到心底話環節，Cloud讀出「迷雲黨」的打氣說話，並剖白自己的內心世界。她感性表示：「出道第3年，我覺得自己大個咗好多，但我都係之前傻更更嘅嗰個我。呢段時間不斷學習、努力，想成為更好嘅歌手，想令『迷雲黨』感到自豪，我覺得好似慢慢做到。好感激大家一直陪喺我身邊，好開心見到好多新面孔，更加開心好多舊面孔依然喺度。」她一度感觸落淚，全場報以熱烈掌聲支持。至於生日願望，Cloud表示希望自己開開心心、健健康康地自在做自己想做的事。正為9月首次參演的舞台劇排練的她，亦希望明年能舉行個人演唱會。