陳秋霞自誇世上難求好老婆：陪老公去夜總會 180億闊太生活3呎大夾萬任攞家用丨獨家
70年代玉女歌手陳秋霞，與坐擁180億身家的「鋼鐵大王」鍾廷森於1981年結婚，婚後定居大馬並育有3女，生活富貴，最難得老公一直準時返屋企又錫到燶。自誇世上難求好老婆的陳秋霞出新書《媽媽語錄》講夫妻趣事，自爆跟老公去過夜總會。自從34年前成為「金獅百盛基金會」主席後，陳秋霞重新審視價值觀，一條裙着足10年，滿腦子都係做慈善。採訪：方騫平 攝影：羅安強 場地：The Gallery@富衛1881公館
陳秋霞自資出新書《媽媽語錄》，紀念入行50周年及故母百歲冥壽，一半收益捐給自己的基金會；另一半撥捐「健康快車香港基金」。新書內容提及媽媽、老公及在大馬生活點滴等。原來陳媽媽是秋霞姐第一代形象顧問：「佢好有要求，話『耳仔窿都會出油要補埋粉，仲有額頭畀頭髮遮住會影響運氣。』」訪問當天，秋霞姐都有遵照母親遺訓為耳仔窿補粉。
老公埋怨唔夠溫柔
跟富商鍾廷森結婚43年的陳秋霞表示，還有大量夫妻相處趣事未能盡錄：「結婚初期老公會比較人家嘅老婆，投訴我講嘢晦氣，服侍得唔夠周到，但我冇屈服呀，仲好威咁代表香港女性發聲『鬼叫你娶咗個香港人老婆咩！』我唔會嗲聲嗲氣，更加唔會同老公揼骨同剪指甲，結婚前仲講明會成日返港探親、唔下跪…兩公婆最重要有商有量，佢可以提出意見嘅。」承認惡咗少少嘅陳秋霞，唔擔心老公有名有利會多女埋身，指老公準時返屋企唔會喺外邊過夜，強調對自己有信心：「我唔係假情假意，而且唔貪錢，用錢仲好有分寸，呢啲經已世上難求。做男人好聰明，會揀個合適終身人選，我呢個老婆做足本分，唔會互相猜忌和嘈嘈鬧鬧，好值得信用及疼錫，所以佢成日話『多謝老婆照顧家庭令佢安心』。」
秋霞姐講老公講到停唔到，連新書都無記載：「佢去夜總會同我講『你都可以嚟！』，我就用八卦心態跟埋去睇下佢做乜，被安排坐佢隔籬枱，佢仲book埋Helen小姐畀我陪我跳舞；而佢就有啲新上場小姐陪飲，有時仲可以交換『囡囡』，不過，我個Helen靚得多，後來我只顧enjoy跳舞都唔理得佢哋咁多，之後有次來港都陪過佢去過中國城。」
覺悟首飾非必需品
新婚半年，阿媽教陳秋霞問老公攞家用，「唔知點開口有啲怕醜，老公好信任我，馬上講出屋企夾萬密碼，教我左擰右擰打開3呎高嘅大夾萬，入面有多疊現鈔，佢話『你攞啦，鍾意攞幾多就幾多！』但我永遠唔會攞晒；有時唔好意思拎得太多，攞多咗又唔知收去邊，唔通帶晒出街咩，最後又放返落去。」陳秋霞會儲起幾個月嘅家用買鑽石，除咗淚水型唔要，夾萬放滿各式各樣首飾，有紀念10月3日結婚周年嘅10卡3鑽石，40年前購入都要幾十萬。」不過秋霞姐怕被朋友指她炫富，即使一屋鑽石都唔敢戴，只收藏入夾萬：「我都唔知買嚟做乜。」直至有次搬新居令她有所覺悟：「因為唔想出動解款車咁張揚，為趕及搬屋吉時，好似打劫咁，將夾萬鑽飾狂掃入環保袋，然後扮拉喼去旅行偷偷搬家當。」後來秋霞姐發覺幾年都冇打開過夾萬內嘅環保袋，代表唔係必需品：「呢件事啟發到我，做乜要為物質搞咁多嘢，帶嚟咁多煩惱？有咁多嘢反而係負擔，要學會珍惜。自從成為「金獅百盛慈善基金」主席後冇買過，夾萬內嘅鑽飾亦已處理。」秋霞姐自言當年新入行奪金馬影后被質疑演技耿耿於懷：「覺得我喺沙灘走兩走，喺病床咳兩聲就死咗，來來去去都係拍呢啲愛情片唔識做戲，直至金馬50年活動上評審委員會為我平反，覺得我一個眼神已秒殺。」