陈秋霞自夸世上难求好老婆：陪老公去夜总会 180亿阔太生活3呎大夹万任攞家用丨独家
70年代玉女歌手陈秋霞，与坐拥180亿身家的「钢铁大王」钟廷森于1981年结婚，婚后定居大马并育有3女，生活富贵，最难得老公一直准时返屋企又锡到㶶。自夸世上难求好老婆的陈秋霞出新书《妈妈语录》讲夫妻趣事，自爆跟老公去过夜总会。自从34年前成为「金狮百盛基金会」主席后，陈秋霞重新审视价值观，一条裙着足10年，满脑子都系做慈善。采访：方骞平 摄影：罗安强 场地：The Gallery@富卫1881公馆
陈秋霞自资出新书《妈妈语录》，纪念入行50周年及故母百岁冥寿，一半收益捐给自己的基金会；另一半拨捐「健康快车香港基金」。新书内容提及妈妈、老公及在大马生活点滴等。原来陈妈妈是秋霞姐第一代形象顾问：「佢好有要求，话『耳仔窿都会出油要补埋粉，仲有额头畀头发遮住会影响运气。』」访问当天，秋霞姐都有遵照母亲遗训为耳仔窿补粉。
老公埋怨唔够温柔
跟富商钟廷森结婚43年的陈秋霞表示，还有大量夫妻相处趣事未能尽录：「结婚初期老公会比较人家嘅老婆，投诉我讲嘢晦气，服侍得唔够周到，但我冇屈服呀，仲好威咁代表香港女性发声『鬼叫你娶咗个香港人老婆咩！』我唔会嗲声嗲气，更加唔会同老公揼骨同剪指甲，结婚前仲讲明会成日返港探亲、唔下跪…两公婆最重要有商有量，佢可以提出意见嘅。」承认恶咗少少嘅陈秋霞，唔担心老公有名有利会多女埋身，指老公准时返屋企唔会喺外边过夜，强调对自己有信心：「我唔系假情假意，而且唔贪钱，用钱仲好有分寸，呢啲经已世上难求。做男人好聪明，会拣个合适终身人选，我呢个老婆做足本分，唔会互相猜忌和嘈嘈闹闹，好值得信用及疼锡，所以佢成日话『多谢老婆照顾家庭令佢安心』。」
秋霞姐讲老公讲到停唔到，连新书都无记载：「佢去夜总会同我讲『你都可以嚟！』，我就用八卦心态跟埋去睇下佢做乜，被安排坐佢隔篱枱，佢仲book埋Helen小姐畀我陪我跳舞；而佢就有啲新上场小姐陪饮，有时仲可以交换『囡囡』，不过，我个Helen靓得多，后来我只顾enjoy跳舞都唔理得佢哋咁多，之后有次来港都陪过佢去过中国城。」
觉悟首饰非必需品
新婚半年，阿妈教陈秋霞问老公攞家用，「唔知点开口有啲怕丑，老公好信任我，马上讲出屋企夹万密码，教我左拧右拧打开3呎高嘅大夹万，入面有多叠现钞，佢话『你攞啦，钟意攞几多就几多！』但我永远唔会攞晒；有时唔好意思拎得太多，攞多咗又唔知收去边，唔通带晒出街咩，最后又放返落去。」陈秋霞会储起几个月嘅家用买钻石，除咗泪水型唔要，夹万放满各式各样首饰，有纪念10月3日结婚周年嘅10卡3钻石，40年前购入都要几十万。」不过秋霞姐怕被朋友指她炫富，即使一屋钻石都唔敢戴，只收藏入夹万：「我都唔知买嚟做乜。」直至有次搬新居令她有所觉悟：「因为唔想出动解款车咁张扬，为赶及搬屋吉时，好似打劫咁，将夹万钻饰狂扫入环保袋，然后扮拉喼去旅行偷偷搬家当。」后来秋霞姐发觉几年都冇打开过夹万内嘅环保袋，代表唔系必需品：「呢件事启发到我，做乜要为物质搞咁多嘢，带嚟咁多烦恼？有咁多嘢反而系负担，要学会珍惜。自从成为「金狮百盛慈善基金」主席后冇买过，夹万内嘅钻饰亦已处理。」秋霞姐自言当年新入行夺金马影后被质疑演技耿耿于怀：「觉得我喺沙滩走两走，喺病床咳两声就死咗，来来去去都系拍呢啲爱情片唔识做戏，直至金马50年活动上评审委员会为我平反，觉得我一个眼神已秒杀。」