陈凯咏手震狂喊死撑话冇事吓亲朋友 做独立歌手攞苦嚟辛致抑郁丨独家
30岁的陈凯咏(Jace)曾被环球唱片力捧，本来上位在望，可惜因理念唔同跟公司各行各路。被冰封一年重新出发的Jace承认情绪曾经不隐，持续几个月手震、口震、系咁喊，甚至透唔到气，吓亲自己及朋友，坦言老咗10年！最后全靠自己调整心态，从地狱逃回地面，努力面对自己情绪唔硬撑，见攰就唞吓。采访：方骞平 发型：Kenki Lau 化妆：Onetung Ma 服装：CELINE 场地：The St. Regis Hong Kong
陈凯咏做了独立歌手半年，继年头推出跳舞歌《百妖夜行的修行》，最近再有新歌《间歇性休眠》：「呢首歌比较sad，唱出无助及冤屈时嘅内心世界，人人都会有情绪低落时候，歌曲可陪伴有压力嘅都市人，纾解情绪，正如歌词都有写『沮丧可以跳一场舞，起码可以刮一场尘土』。」
与世隔绝自我疗愈
自爆曾陷入抑郁状态的Jace谂起都惊：「情绪低落冇特定原因，应该系一路以来累积嘅情绪，冇即时跳返出嚟，𠮶时觉得好无助，日日系阴天，冇人可以讲，冇出路，冇方向，好沮丧，唔知点算好。」Jace更曾经试过持续几个月辛苦到手震、口震、讲唔到嘢、透气困难，眼泪系咁流出嚟，「同平时乐观性格完全唔同，唔再认识自己，连自己都吓亲，但又唔敢同父母讲，朋友见我冇晒精神动力好憔悴，知我好唔妥，只不过我死撑话『冇事』。」最后渡过困境，全靠暂时折埋自己，「情绪受困扰过唔到，索性与世隔绝吓，畀自己休息，寒冬过后又到春天！」Jace认为每人都会有情绪，小朋友读书都会好辛苦，要学习点样去面对，「有首歌陪伴好重要，《间歇性休眠》记录低我嘅冤屈状态，录音前及录音期间都爆喊。」
悭自己坚持做音乐
自我隐形一排后，Jace回归乐坛，仲做埋老板，乜都自己话事，做乜音乐类型都得，虽然有主导权，但有得就有失：「作为团队队长，乜都要重新学习及处理，尤其市场状态不停变，日日面对嘅嘢太多，好多嘢都唔识，消化唔到个人会乱，所以会困惑又会攰啲，好似突然老咗10年，不过，半年间多咗10年知识都值得呀，ok唔惨㖞。」冇咗大公司支撑，至今Jace自资出咗6首歌，事事需财，她强调金钱上仲顶得住：「我对数字唔系咁敏感，但总算经营到，做到想做嘅音乐，想嘅试嘢，有赖大家支持。」她笑说为坚持做音乐，会稳守成本及悭自己：「入行咁耐(5年)冇买过一个名牌包包，最贵个银包7000蚊经已好肉赤喇，我唔重视物欲，好易得到心灵满足。」
Jace对于重新「杀入」乐坛以游水作比喻：「游住先，探索下先囉，虽然中间有唔同嘅船只嚟接我，可以快人一步埋岸，但𠵱家可以自由自在游去唔同岛屿，仲能够踩住水晒阳光，可能会吃力及攰啲，系有啲攞苦嚟辛，唔踩反而唔知身体好呢，踩水经历更能强身健体，唔使急于游埋岸㖞。」