AGA自爆做過Rock妹 邀林德信任嘉賓講夾Band往事 新歌故事源於朋友飲醉酒？

江海迦（AGA）日前於深圳灣體育中心春繭體育館舉行《AGA ONEDERFUL LIVE》深圳站，開騷當日深圳下起連場大雨，不過亦無阻粉絲熱情，能容納9000人的場館全場爆滿。

AGA邀請到相識超過10年的好友林德信（Alex）擔任嘉賓，說起二人相識經過， AGA自爆自己以前是「Rock妹」。她說：「大家有所不知，其實我曾經都係一位Rock Girl嚟。幻想唔到係咪？我入行前玩第一隊Band就係因為Alex拉我入去，所以渡過咗一段用搖滾音樂表演嘅時間。」林德信補充說：「補充吓佢講嘅故仔，有一晚我喺Music Bar同朋友Jam緊音樂，嗰間Bar好正，所有人都可以隨意上舞台一齊玩。當我喺度唱歌嘅同時，突然之間聽到後面有個唔識嘅女仔彈住琴唱歌。然後我擰轉頭，見到『咦，靚女嚟㗎喎！』我就係咁認識咗AGA，然後我哋好快組咗隊Band。」AGA又笑言，自己曾擔任Alex第一首歌嘅的MV女配角，是有飯盒的特約演員，還打趣叫樂迷不要找來重溫，之後交舞台給林德信獻唱《敢愛敢做》。

新歌內容啟發自一位朋友

AGA剛推出新歌《DRUNK DIAL》，於深圳站舞台首次公開演出，她說：「首先要介紹一下，我將會推出一張全新專輯。呢首歌係我七年前寫起，故事啟發自一位朋友，講述關於飲醉酒後打畀朋友㗎，而我每一次都會阻止佢。就係因為呢個原因，所以我寫咗呢首歌，展開呢個新碟計劃。好開心可以喺呢度同大家分享新碟嘅第一首作品《DRUNK DIAL》！」