陈德森因投资者轻生家人中风患癌致情绪病！求医更抑郁：讲咁多都未入题，我已经唔见咗3千丨专访
「金像导演」陈德森（Teddy）的从影之路绝对可媲美他的电影作品，因被徐小明睇中成为特约演员，其后加入丽的电视编剧组成为编剧，转个头又做了成龙大哥的第一个助手，但很快又向成龙请辞，决心追寻导演梦，多年来拍过不少叫好叫座的电影。不过陈德森两度受抑郁症煎熬，令人生陷入前所未有的困局，最后陈德森选择自我心理治疗，终于走出死荫幽谷。陈德森在64岁生日的时候，推出自传《把悲伤留给电影》，并透露今年有一个新计划，将进军YouTube界成为KOL。
相关阅读：成龙与陈德森断交20年因为两个字：冇佢就冇今日嘅我
陈德森两度受抑郁症煎熬：
自传《把悲伤留给电影》记录了不少陈德森的故事，当中有部份情节曲折离奇，正如陈德森所言：「前半生如戏，后半生戏如人生。」日前陈德森在尖沙咀接受《星岛头条》的访问，他透露已经计划推出第二本新书：「下一本书叫《他她它和祂》，我呢生遇到好多神奇嘅人，有超能力嘅人，有神通嘅人。我成日都讲，劝人做多啲善事，虽然我系一个佛教徒，有啲人一唔好就会走去算命，几犀利嘅神算，算到好多唔好嘅嘢，要小心啲乜嘢。算到你嘅寿缘去到几多，但如果你做多啲善事，你嘅人生同命运系会改变，可能我信呢样嘢，每到一个时候，有啲困难，去到低谷嘅时候，就会有呢个人出现，真系好奇怪。」
《把悲伤留给电影》收益全做善事
同一时间，陈德森今次亦有新构思：「我本身有好多电影剧本未拍，所以不如先写成电影小说，如果到时有人睇中想改篇，咁咪多一条出路。我一直都唔识得敲门，喺电影最煇煌嘅时候，我系最懒，我系重质不重量，起码我今生冇后悔，拍得唔好系我问题，但系我系制作认真。如果制作费系偏少，我唔介意揾啲同我啱倾嘅新导演出嚟，我做监制，而家后生拍戏做得好好，好多镜头同画面仲拍得好过我，我冇呢方面嘅观念，好多镜头嘢都交俾摄影师，我就拍人拍戏。」除此之外，陈德森亦计划进军YouTube行列，找来身边的朋友分享对抑郁症的所见所闻。
陈德森求医反令抑郁症更严重？
陈德森在2003年筹备电影《十月围城》时一波三折，除了主角难寻，拍摄时还碰到SARS停工，其后又因投资者轻生令资金被冻结，母亲在澳洲探亲时中风昏迷，胞姊同一时间患癌症，接二连三的突发事，令到陈德森身心无法承担而患上抑郁症，到了2009年，《十月》再度开拍，再因沉重的压力令抑郁复发。对于当年的经历，陈德森说：「我最严重嘅时候，应该系第一次，有人介绍咗个心理医生畀我，应该系全香港最贵同最好𠮶三个，睇一次差唔多要9000蚊，佢好似畀咗9折。𠮶阵佢嘅办公枱后面有个大钟，枱面有一个计时器，医生问我叫陈导演、导演、陈德森定Teddy好啲，我话冇所谓，仲话可以瞓喺梳化同佢倾偈，最紧要系舒服，跟住又话不如由有记忆𠮶阵开始讲，我咪话唔睇，佢问我乜嘢原因，我咪话望住大钟过咗15分钟，你讲咁多嘢都未入题，我已经唔见咗3000蚊，我嘅抑郁症更加严重，佢最后都有开药畀我，但系我话食唔食自己决定，跟住个医生走咗，我食咗2日，系要完全令你唔谂嘢，个人high high哋，我觉得唔啱自己，系唔食得。」
陈德森受成长经历影响
回望人生，陈德森坦言成长经历对他有很大影响：「其实我自己唔系几好，成日赖咗爸爸妈妈，但系我觉得实际系有影响，系童年阴影，我一直都唔系好信家庭同婚姻呢件事，包括20几岁啲朋友结婚，10对先得一对非常好，有一对各有各精彩，系为咗细路仔先一齐，有7、8对都系分开。到咗做导演，我系一个随缘嘅人，唔系唔积极，只系有好嘅题材先会拍，呢行好老板又可遇不可求，变咗𠮶个生活好平淡，自己一个人又好安稳。如果我自己有家庭，要好好负起呢个责任，起码都要供佢读大学，呢啲系最传统同基本观念，但系我觉得照顾唔到自己，点去有个家庭？」他续说：「我自己一个人，唔钟意嘅戏可以唔接，人生到咗年纪大，就系简减化，朋友都系，唔好嬲一个人，佢都有佢嘅问题，佢都有佢嘅环境，咪唔来往囉，大家路不同不为谋，我都唔会嬲你。以前后生唔系，我同你咁好，我哋16岁就识，后生一齐去尖沙咀媾女，大家创作又互相帮忙，到而家唔对我？人生乜嘢都系减化，年纪大冇咁多精力。」笑问有不少90年代导演都是早年结婚，离婚后到晚年再娶另一个，陈德森笑说：「咁又唔系，有啲都有好好，好似陈可辛，林超贤都好好，可能有啲走咗去内地，小朋友因为读书问题，多数都留喺香港，变咗一分隔两地，好自然会出问题。当年好多人喺97年移民加拿大，有啲人嘅婚姻都有出现问题，只要一喺两地，就会有问题。」
三级片《晚九朝五》当年上映惹争议：
陈德森：电影令到我有抑郁症
经过漫长又痛苦的非人生活后，陈德森在宗教信仰影响下学懂了4句话：「面对它，接受它，处理它，放下它。」陈德森更发现原来抑郁症系来自公司，他说：「因为疫情，倾啲嘢都倾唔掂，冇收入，同事又跟我好多年，𠮶阵疫情又难揾工，咪谂住顶得几耐得几耐，但系到后期系顶唔住，最后解散咗间公司，问题亦relese咗。」对于目前的人生，陈德森说：「我同自己讲，所有嘢都要有happy ending，唔要有负面，要话畀全世界知，明天会有希望。而家冇咁执着，以前成也电影，败也电影。除咗拍电影，我11点零返到公司搞行政嘢，中午约电影人食饭，下画约人食饭倾剧本，HAPPY HOUR都系同电影人，食饭边炉都系同几个监制导演，就算夜晚唱歌都可能同啲演员，我系离唔开电影，电影令到我开心，攞奖又票房好，唔开心又系因为电影，好似人生冇第二样嘢，亦都系电影令到我有抑郁症。」
陈德森：人生不可没电影，但不可只得电影
陈德森续说：「我知道个问题喺边度，我嘅人生唔可以冇咗电影，但唔可以只系得电影，所以咪开始有宗教信仰，好似起庙呀，修庙、修路呀，慢慢咪做慈善嘅嘢，做咗慈善老人院同老人服中心，咁个心入面咪唔系得电影，如果你做得唔好，好难喺下一个创作度好颓，可能会越搞越颓，成班电影人坐度饮酒，系解决唔到问题，最多系慰藉下。我而家叫人捐钱，可能失去咗好多朋友，经济唔好可能好烦，咁我咪帮慈事机构拍嘢，帮手推介下佢哋，全世界都可以睇到，我而家已经跳出咗开心程度，系觉得应该去做，我拍电影唔工作嘅时候，度桥做下呢样嘢，亦不停RUN我嘅技术，我嘅人生多咗一个选择同生活方式。」
陈德森执导电影《晚九朝五》曾惹争议
看见陈德森，不得不提他在1994年执导的电影《晚九朝五》，当时上映已经惹来很大争议，他说：「主要系一写三级，就唔系暴力就系色情，但系我呢个三级系讲好真实嘅SEX，一夜情，滥交多角恋，呢啲人冇明天冇乜希望，聚焦喺一齐，但系我冇批判呢件事，你去选择你嘅生活，最后都系有人结婚。」陈德森直言当时「系好惊」：「好似《色情男女》入面嘅张国荣，佢系拍唔到艺术片走去拍三级片，呢个咪系我嚟，我日日匿喺度，见到女主角喊，好似卖人落火坑。」笑问这经历被当为蓝本？陈德森说：「咁我又唔知，但系当时系有人揾我做徐锦江个角色，要我背部全裸，后尾谂谂吓唔得，真系架，𠮶阵我哋成班导演嘅关系好好，成日好多嘢都互相交流。」
摄影：谭志光
其他文章：