前「新闻女神」麦诗敏揭多年受性骚扰 出书分享8年主播生涯秘史 丨独家
31岁前TVB「新闻女神」麦诗敏(Gloria)因为报导「中东呼吸综合症」新闻狂食螺丝而「一举成名」，趁今年书展她推出处女著作《新闻主播工作实录》，分享8年主播生涯嘅血泪史，记载着过臭狐衫、被痴汉追踪返屋企吓餐懵等经历，不过以上嘅事只属冰山一角，不能尽录嘅秘史，最爆嘅原来多年来收过逾百个性骚扰短讯，甚至有样、有特写性器官，极为变态。采访：方骞平 场地：雪园壹号
毕业科大工商管理嘅麦诗敏染指新闻界系由爸爸鼓励，Gloria爸爸麦振江来头不少，系周润发、任达华第3期TVB艺训班同学，更加做过港台《警讯》主持人。一年前Gloria离职，希望趁年轻挑战更多范畴。
挨通宵狂食螺丝
喜欢执笔写故事的Gloria今年4月应邀出书，新书分「由零开始」、「高山低谷」、「厂外的世界」、「海阔天空」4个章节，如同写日记，回忆8年主播生涯及拆解镜头后秘密。主播生涯有过最抑郁阶段：「入行头一年做『全通』，通宵更由凌晨12时直踩到早上7时，日夜颠倒特别容易打乱女仔生嘅理时钟，因为状态唔好，录影时变本加厉系咁食螺丝，不停重录(当年有录播部份)阻到同事收工，咁自然会唔多高兴，『垃圾』两字明显挂喺面容上，咁我梗系有hard feeling，好崩溃，仲衍生咗『中东呼吸…中吸呼吸综合症…』食螺丝事件。」多年后嘅今日，Gloria已唔再避忌重提伤疤，但当时就吓到成个人震晒：「我读咗3/4次都系错，越急变越乱，事后好惊被老细『照肺』甚至严重被炒；俾爸爸怪责，翌日返到公司都唔敢抬头，结果佢哋冇闹我，反而一觉醒来被网民疯狂抨击，留言『读到咁㗎』、『好唔专业』、『唔好做啦』后来老细要求我『脱产』再培训。其实冇得被做日更新闻主播，持续一年『全通更』，对主播嚟讲系种大惩罚，亦激发我要奋发图强努力读稿，终能变身高级主播。」
着臭狐衫好难顶
至于主播服装方面，Gloria指借出镜衫时借到有味(臭狐)衫最难忘，后来变成平常事：「所以后期我用公司嘅服装津贴淘啲平价私伙衫，𠵱家唔同颜色嘅战衣累积过百件，堆满衣柜。」说到恐怖经历，试过凌晨收工回家，喺屋企楼下竟有中年男Fans等她：「佢好清楚我嘅更表；有晚我收10点，佢就喺港铁站等我，跟埋转小巴，吓到要急Call爸爸去附近快餐店接我；亦曾有写住『麦小姐』嘅电话壳、汤券等礼物放喺住所楼层䢂口。」她又自揭最爆的，8年来收过逾百个性骚扰讯息：「原来外间对主播充满著遐想及迷思，变态留言有『好想X你、』『几时着黑丝？』甚至会有自拍全身，有埋性器官大特写相，我都见怪不怪唔，又唔系喺我面前祼露咪由佢囉，我会当笑话咁同男未婚夫分享。」
想同阿佘做「主播」
另外，Gloria希望效发师姐方健仪嘅成就：「我好崇拜呢位师姐，细细个就有留意佢报新闻；至于现职嘅前辈方东升既有才华个人又Nice，佢好肯提点后辈。」对于「新闻女王」佘诗曼，Gloria大赞阿佘演到真嘅一样，入型入格好有霸气。她建议《新闻女王2》可以加啲主播、记者出Trip采访环节，令内容更有真实感，她还笑住自抽：「都可以用『中东呼吸综合症』食螺丝事件做题材，透视新人在通宵更劲大压力一刻。」Gloria今年开始主持《健康关注组》，她想挑战埋拍剧及综艺节目，笑言可自荐客串拍《新闻女王2》，做返主播位最合适。