裕美不满被责性冷感爆林作床事：佢话嚟就嚟好冇Mood 出歌俾黑粉抨击冇身材丨独家
最近裕美自资6位数字推出新歌《最佳女友的自我修养》，唱出「最佳女朋友」嘅心路历程。和全城闹爆嘅「抽水王」林作拍拖6年，裕美不时为男友拆弹，被封为「最佳女朋友」，唯独裕美常投诉林作冇性欲，两人性生活唔多。34岁林作则揭床事为自己「唔得」大平反：「佢唔肯同我玩角色扮演，最呕心着我啲底衫裤瞓觉，甚至换上核突长袖阿婆睡衣。」采访：方骞平 摄影：罗安强
裕美系2007年乐坛新人，唱过《雪映移城》、《搭错车(Yamete!)》等歌，最后一首作品系2011年嘅《怎么还爱我》。时隔13年，她以原名和田裕美重新出发，回归乐坛，获唔少网民留言支持，大赞当年回忆都返晒嚟；但有啲无聊负评，踩裕美冇波、个样又胶！搞到裕美要亲回「招呼」佢哋：「我直接留言话『关你乜事？』、『你唔会系我杯茶。』以前见到呢啲会唔开心一日，但𠵱家真系唔会在意，反正我又唔识得佢。」
由迷失变成功女性
林作展示裕美留齐阴肥嘟嘟旧照，大赞女友各方面都越来越有进步：「人要有历练，佢明白到齐音及肥胖唔系方法，所以要揾返自己…识佢6年睇住佢升华变咗另一个人，由最初处于抑郁、迷失状态，要食药治疗；𠵱家佢好强好独立。」林作更自爆有恋母癖，他眼中嘅裕美已有妈妈年轻时强人模样，揾钱目标清晰。裕美解释：「系因为佢常出事，要变得心脏强大去支持佢，加上佢咁度缩，明白男人唔可靠，要发奋揾钱。」拍拖6年，两人已挨过磨合期，甚少争吵，林作搞鬼形容跟裕美关系似屋企4只狗：「佢哋虽然同一屋簷下，但唔系friend，会各自各瞓开。」
冇配套协调性生活
谈及性生活，35岁裕美直认跟林作性生活唔协调：「我自己冇问题，只系唔得佢『话嚟就嚟』，咁样好难有mood。」林作强调系大家情趣品味唔同：「我钟意玩角色扮演，要求佢扮老师等角色，甚至曾经准备晒皮鞭、手铐等情趣用品，点知佢离开TVB太耐冇晒啲表演欲，𠵱家冇任何配套提供到畀我…」林作越讲越激动叫大家评理：「初期佢都有着性感内衣嘅，打后唔系着住我啲低衫裤嚟瞓，再过份啲会换上极度呕心，令人冇晒性欲嘅阿婆针织衫，我曾经多次要求佢换衫，佢只会变本加厉买多几件唔同色系，然后嘲笑我对件衫有恐惧，因为佢一件衫，摧毁咗我哋一段感情呀！但我仲可以克服阴影，鼓起勇气『话嚟就嚟』仲想点呀？佢偏偏只系讲个果，忽略讲解因。」裕美则答辩：「因为怕冻嘛，佢对我冇乜性趣仲好，悭返啲时间嚟瞓觉，反正大家都咁忙，而且对住佢冇乜幻想空间，通常佢会自己『解决』。」林作认为自己系个正常男人，只要解决到睡衣问题，就唔会一年『行埋』得1/2次咁少。」
已成功收拾新何太
另外，林作曾以100万邀约金揾新何太开班教「煲汤」，最后新何太不满分红问题反口唔捞，还寸林作冇「肾容」(信用)，「被钉」律师牌证明人品差！林作对此火速反驳，怒插新何太嘅片令网民大快人心，旋即翻盘获力撑。终被赞系「靓抽」，林作分析说：「要揾个畀我更乞人憎嘅对家唔容易，对手唔系时时有，上次𠮶个系钟培生。不过，系有唔少网民有DM我，话我帮到大家发声及出啖气。」面对何太出口狂言，林作唔打算入禀控告：「冇钱及太有实力嘅人系唔会搞，佢有钱就唔系叫新何太啦，费事嘥时间兼蚀埋律师费，𠵱家我经已成功收拾佢啦。」