姜濤獲預祝生日 AL向粉絲示愛
MIRROR美加巡唱圓滿結束後,12子日前返港獲大批鏡粉(粉絲暱稱)接機,惟有指當時有姜糖(姜濤粉絲)和神徒(Anson Lo粉絲)一言不合大打出手。12子返港隨即繼續宣傳《12怪盜》,昨日姜濤和Anson Lo分頭謝票,兩幫粉絲爆爭執後未再碰頭,快將25歲生日的姜濤獲姜糖不停送生日祝福,有人大叫「笑一笑世界更美妙!」為他打氣。Anson Lo獲神徒大講示愛心聲,身旁Jeremy都大講I Love U!
昨日姜濤孖Jer一組、Anson Lo孖Jeremy一組,分頭為《12怪盜》謝票。姜糖和神徒日前傳出在接偶像機期間大打出手,昨日姜濤和Anson Lo則分頭出席謝票場,兩幫粉絲未有機會再碰頭,現場氣氛良好,未再提及爭執事件。晚上姜濤和Anson Lo歌迷會也有分別包場,兩人繼續謝票,吸引大批鏡粉到場。
Jer想做救生員
姜濤孖Jer一組謝票期間,不少姜糖對本月30生日的姜濤講生日快樂,姜濤多謝大家又笑指自己仍是24歲,有姜糖高呼叫姜濤:「笑一笑世界更美妙!」有粉絲問到若做Boss會委派兄弟做甚麼任務?Jer笑言要去沙灘做救生員,姜濤即反問是否要除衫?Jer又以「12光豬」作形容,粉絲聞言興奮大叫「正呀!」
慢動作重演對打
12子今次在片中有不少動作場面,有不少鏡粉想一睹偶像即場示範武打動作,Anson Lo孖Jeremy謝票時,Anson Lo應神徒要求即場示範片中武功,與Jeremy大玩慢動作重演對打,Anson Lo坦言想再挑戰拍打戲、下次會做好些,粉絲即大讚叻仔。
有神徒趁機向Anson Lo講會照顧好自己、叫他不需擔心,並問他最想聽誰人心聲?他想了很久仍表示最想聽神徒心聲,身旁Jeremy即場對他派心心講「I Love U」,搞笑地要求他也要大聲講「I Love U」,他即時答應,同時感謝全場神徒表示辛苦大家,冧得全場尖叫。
姜濤在謝票後回應近日Fans之間不快事件,他說:「呢一兩日不停了解整件事件嘅經過,發現網上都流傳咗唔同嘅版本,不過無論點樣都好,事件已經發生咗,我淨係希望大家可以安全快樂去支持我哋,唔好有任何爭執或者碰撞,呢個係我哋最唔想見到。我同Anson Lo 都有傾過,我哋都覺得好苦惱,唔知點樣做,呢件事發生咗唔只一、兩次,但好似一直都冇辦法解決,冇諗過一件Suppose開心嘅事情,會變成咁樣。因為每次見到我哋嘅支持者,不論係Fans或任何人,大家不論支持我哋MIRROR或是任何一個,我哋都係咁開心,因為真係一種鼓勵,所以希望以後每次見面,都可以係愉快、平安、安心地去進行。」