陳瑞輝Frankie出新歌剖白內心世界 否認被團欺與Ian最啱key
陳瑞輝(Frankie)首支派台作品〈皮思苦〉是他自己的內心剖白,讓大家知道有時外界對他可能有誤解,但其實眼看到都未為真,有時要深入了解,才會看到真正的陳瑞輝。早前他便為歌曲拍下〈MV〉,以幾可亂真的場景,來比喻別人看不到他那鮮為人知的一面。
〈皮思苦〉由Oscar填詞,在溝通的過程中,Frankie發現:「原來我同Oscar都有好多共通嘅諗法,覺得如果由佢擔任MV導演,可以將〈皮思苦〉嘅精髓放入MV裡面,所以我就邀請佢執導,並採取絕對嘅信任。」而Oscar就以虛幻嘅場景,來比喻Frankie的個性。Frankie介紹道:「Oscar起初同我講個Idea,係將鏡頭入面睇到以為係真嘅嘢,再Show清楚俾大家睇嘅時候,原來係假㗎!聽完覺得好得意,但又覺得好難實現到,不過Oscar將想法實現晒,例如我身上用紙造嘅白色西裝,仲有燈同電話蛋糕,真係冇諗過全部嘢都咁像真!唔知大家睇MV,發唔發掘到邊啲係真,邊啲係假呢?」
說到大眾對自己的誤解,Frankie說起過去一次遭遇,他說:「試過去睇戲,散場好多人,有個Fans見到我,想搵我影相,但因為喺扶手電梯,好多人,唔方便停低,我就婉拒了,後來發現佢有dm我話唔開心。呢件事我都唔開心,但我又唔可以直接同佢講原因何在,又冇時間交代清楚就要趕住走。其實成日都有好多呢啲我做得唔好、做得唔足夠,令大家對我期望有落差嘅事情,但自己總覺得唔緊要啦,大家之後都會明白,同埋Fans都會知道真正嘅我係點樣,會繼續支持我,有大家繼續陪伴就足夠。」不過出道5年,Frankie覺得這些落差都有所累積,所以都很希望透過行動,讓大家見到自己真正的一面,但同時他亦會繼續做好自己,而推出〈皮思苦〉就是第一步。
Frankie又舉出了另一個例子。作為MIRROR的成員,在參與團綜時,Frankie總予人是團欺的對象,但Frankie道:「我又唔覺得係團欺嘅,大家都睇得好開心,我又嘗試去Enjoy落去,感覺都OK喎,先會有咁嘅形象出現。以前嘅我未必係咁,但久而久之,鏡頭以外,我都變成係咁喇!呢啲係自己不知不覺嘅轉變,但其實我係比較單純、直接、慢兩拍嘅人。」
Frankie特別談及與陳卓賢Ian早前在MIRROR演唱會一同擔任其中一晚的彩蛋,觀眾見二人拖手合唱,尖叫聲震耳欲聾,Frankie戴了耳機也清楚聽得見。正當大家以為這是罕見的CP,但其實Frankie與Ian份屬好友,Frankie道:「我同Ian最夾係Lay Back嘅態度,譬如對於一件事嘅感受,Alton、AK會即時表態,但我同Ian都係唔會即刻分享感受嘅人,會諗過度過先講出口,而Ian係會附帶行動力,諗完會出聲表達想法,而我就會唔講出口居多,但其實我哋好多嘢都有相同嘅想法。」Frankie笑言,往後日子除了要以最自然、最真的一面,面對鏡粉、皮寶寶,面對大眾外,同時亦會像Ian一樣亦要添加一份行動力,讓大家更了解陳瑞輝是怎樣的一個人。
《星島申訴王》已推出全新項目「區區有申訴」,並增設「我要讚佢」欄目,現誠邀市民投稿讚揚身邊好人好事,共建更有愛社區。立即「我要讚佢」︰ https://bit.ly/3uJ3yyF
想睇更多精彩內容,請立即瀏覽「區區有申訴」活動專頁,https://bit.ly/41hgS9E