独家丨卢觅雪呻同AL少交流Ben Sir赞好Edan 首演夫妻超夹求拍床上用品广告

卢觅雪（Michelle）和Ben Sir（欧阳伟豪）在ViuTV剧《社内相亲》首合作演女主角陈汉娜父母，因为一拍即合，希望继续拍住揾真银，更即场度广告Idea，又海狗丸又口服液相当搞笑。至于跟MIRROR成员Anson Lo（卢瀚霆）和Edan（吕爵安）合作，Ben Sir向「神徒」晒命，笑指亲手感受过AL的结实肌肉；又赞Edan是吹水高手，对老人家仲好好𠻹。采访：杜杜摄影：Stanley

Michelle和Ben Sir虽然初次合作，但因为是同年代人，经历相似好易沟通。

两人称导演冇要求他们跟足韩版，但为演好角色都有煲剧。

Michelle奇怪一埋位已跟Ben Sir有老夫老妻感觉，「我哋虽然识，但真系唔熟，完全冇私交，我连佢电话都冇。」Ben Sir最希望剧中一家能带到欢乐畀观众，「成个社会都苦瓜干咁，除《爱回家》外，多一个选择，哈哈！」Michelle提「老公」要趁机招商，Ben Sir即话：「最紧要有广告先支持到我哋个笑容，雪雪and Ben Ben，可以卖床上用品，仲要互送礼物，佢赠啲海狗丸或者前列腺丸畀我，我就赠返佢妈咪口服液、静心丸咁。」Michelle提议一家人可卖家庭保险广告，「𠵱家好兴，仲有啲年金，自愿医保，哈哈！」Ben Sir笑得劲开心。

要求两人重演剧中关系，Michelle即以拳头对住Ben Sir。

Ben Sir听到Michelle提议剧中一家可拍保险广告，兴奋到癫咗。

Edan好照顾家英哥

讲到跟Anson Lo和Edan合作，他们完全感受到两人粉丝的应援威力。Michelle曾于2019年跟Edan合作处境剧《娱乐风云》，她赞他成熟不少，「我哋本身有一齐玩，合作起嚟会更容易。」另外Michelle叹私下未有太多机会接触AL，「佢工作态度好好系预期之内，但唔知佢个人系点，因拍摄地方细，搬机位要返各自休息室，冇乜机会交流。」Ben Sir眼中AL比较cool，「我同佢交流嘅戏得一、两场，但试过完咗拍佢膊头，好实嘅，系坚嘅，哈哈！」至于Edan感觉比较亲和，「我哋倾到偈，佢又叫我教吓佢英文，大家又倾吓大学选修科，佢话拣𠮶科因为易啲，佢吹水能力系高嘅，同埋好照顾老人家，对家英哥照顾周到。」

两人都话陈汉娜好有阿女feel，又赞她演绎到位。

Michelle只有埋位时，才有机会同AL接触。

Ben Sir话AL比较cool，但都有一齐搞笑。

《星岛头条》新网站有更多精彩内容：http://www.stheadline.com/