獨家丨陳柏宇被網民叫退休:退唔退都唔關你事 初出道保形象唔敢認同裕美拍拖
陳柏宇(Jason)為新歌《日常事故劇場》創作變奏部份,又在MV中狂扮鬼臉,以表達台上台下兩個樣。Jason認為鏡頭前後的自己基本上一致,只因他早已放下偶包,兼且對負評一笑置之,甚至可以好冷靜地去分析。採訪:杜杜 攝影:羅安強 髮型:Alex @The Attic 化妝:Jessica Chan 服裝:INITIAL場地:212 Studio
Jason刻意將歌曲變奏,源自demo有點靈魂出竅感覺,「鍾意聽啲日式melody,通常會有好多變奏,𠵱家韓國歌都多咗,但香港比較少,因為基本可以做到兩首歌。」提到拍MV,Jason覺得扮鬼臉特別好玩,「概念嚟自《The Truman Show》(《真人Show》),主角好似演緊個故仔,但其實係做緊自己,都幾似我,台前台後都係一個人,而唔係設計出嚟嘅角色同形象,所以MV其中一幕,就係陳柏宇台上台下畀觀眾感覺係乜嘢,用鬼臉去交代。」
一早放低偶像包袱
Jason承認初入行時都有偶包,好多方面都要收埋,「嗰時同裕美拍拖咪係囉!食煙、紋身都係。」但他近6、7年知名度提升,偶像包袱亦開始放下,「大家唔會靠呢啲嘢去斷定你,大概知你係咩人咪可以free啲。」他現在連網上的負評,一樣可以看得開,「以前睇都會𤷪啲觀眾嘅愚蠢,今時今日真係唔理,嗰啲comment用嚟攻擊,背後又邊會有邏輯啫!同事見到個comment話『陳柏宇應該退休啦』,呢啲好低B,哈哈!我退唔退休都唔關你事,同埋你估我唔想退休呀!我冇能力退休嘛!我係唔退你又吹呀!呢啲真係笑多過嬲,冇嘢好嬲。」他仲可以好理性咁分析,「1個或者10個負評唔代表啲乜嘢,可能有1萬個觀眾,認同或者唔介意你做嘅嘢,你唔可以為咗10個觀眾放棄1萬觀眾。」不過他依然有其他方面壓力,「搵錢同埋克服表演嘅緊張,呢啲問題長期存在,尤其細女出世後,過多幾年就要讀書,讀書要錢㗎嘛!」
《星島頭條》新網站有更多精彩內容:http://www.stheadline.com/