彭楚盈案丨翁靜晶親述撞鬼經歷!死者「現身」伸冤預先通水:證人唔嚟喇
59歲翁靜晶早前開YouTube頻道「危險人物2.0」,以影片方式再談多宗陳年重案。日前翁靜晶YouTube頻道「危險人物2.0」上載新片,主題是「模特兒彭楚盈白骨案」,翁靜晶2005年接獲模特兒彭楚盈家人求助,翁靜晶向政府提出召開死因庭研訊,至今她仍深信這是一宗冤案。翁靜晶更於片中大談曾與死者彭楚盈「接觸」的靈異經歷,指全因彭楚盈預先「通水」,才不至於上庭時手足無措。
【相關閱讀】:東張西望丨「假和尚」疑再來港化緣搵食 翁靜晶列3點教分真假:個砵只裝食物唔可以收錢
【點擊睇翁靜晶再談彭楚盈白骨案】:
翁靜晶與律師徒弟Marten一同拍攝新一集「危險人物2.0」,當年翁靜晶與Marten是彭家的代表律師,為死者彭楚盈提出召開死因庭研訊希望得出死因。1999年模特兒彭楚盈遺體被發現於油麻地一大廈單位內被發現,多年來被稱為「白骨案」,早前熱爆電影《毒舌大狀》亦被指是以此案作藍本改編。翁靜晶稱彭楚盈被發現時身手異處,頭顱更在垃圾桶內,經調查後估計彭楚盈屍體由床上跌下床,頭顱因此跌入垃圾桶內。
翁靜晶:本來被列為謀殺案
翁靜晶指當年彭楚盈在單位內被發現後,首隊到場的警員即時列此案為謀殺案,翁靜晶表示:「但過咗半個鐘頭之後,有另外一隊警察,應該係九龍城(警署)嘅,佢哋就嚟接手呢單案件,然後即刻將佢列為屍體發現案,半個鐘頭就由謀殺變屍體發現,點會咁兒戲㗎呢?咁原來呢個九龍城(警署)入面個主管、一個西人嘅女主管……警司,佢就係陳方安生嘅閨密嚟嘅。而呢個單位嘅業主,就係陳方安生個阿哥方曼生。而不為人知嘅就係個死者……嗰副白骨就係一個叫彭楚盈嘅模特兒,佢就係方曼生嘅情婦嚟嘅。」而翁靜晶憶述當年有記者到場採訪,方曼生只表示自己是單位業主,而彭楚盈是他的租客,翁靜晶指:「佢(方曼生)話『佢(彭楚盈)6年都冇交租,於是我搵人嚟收樓,就發現屍體』,呢個係佢(方曼生)嘅講法。」
翁靜晶接獲彭楚盈家屬求助
翁靜晶認為此案疑點重重,後來接獲彭楚盈家屬求助,翁靜晶表示:「我睇咗現場嗰張相,個分佈就講得唔妥,於是就開記者召待會,後來就逼使到香港政府就重開死因庭。」直至2006年召開死因庭研訊,最後雖然都找不出彭楚盈死因,但是翁靜晶認為研訊過程中找出了不少真相,翁靜晶表示:「搵到好多人作假口供,呢單案到而家都畀人一種有強權無公理嘅感覺。」
【點擊睇更多翁靜晶舊照】:
翁靜晶:我同彭楚盈傾緊偈
翁靜晶律師徒弟Marten憶述當年接獲彭楚盈家屬求助後,處理案件期間曾接觸過死者彭楚盈的鬼魂,翁靜晶當時更激動得即時致電給徒弟Marten,又請來家傭作見證,翁靜晶分享道:「開庭程序係會傳召每個證人上庭,個證人講好咗聽日係邊個(上庭),咁你要準備㗎嘛!當時就知道第二日會有個好似係的士司機會上嚟被盤問嘅,Marten就準備好晒啲問題啦,我覆核一次就準備瞓教,點知臨瞓就聽到房度發出『滋滋聲』。」翁靜晶一度以為漏電,與家傭幾乎將所有插蘇拔掉,但「滋滋聲」仍然存在,「跟住就開始奇怪喇,我就知道個聲跟住我,好似喺我面前咁,我就知道大件事喇!我就直情即刻打電話落去,劉師傅(劉家良)喺樓下睇緊電視,我話『有鬼呀有鬼呀』,跟住我就拎住一張紙,一邊寫Yes,一邊寫No,我仲摺埋張紙仔……三角嘅,我就話『你係咪彭小姐』,之後啲『滋滋聲』好犀利,我就話『OK,你用個箭嘴指Yes定No,指畀我睇你係咪彭小姐』,我就喺度等,但係佢係冇力推個箭嘴嘅,我先知原來睇電影入面話可以郁啲嘢係唔得嘅,係冇力嘅。」而神奇的是翁靜晶指彭楚盈以「滋滋聲」回應她就是彭楚盈。
翁靜晶:彭楚盈唔識嗰三個道友
翁靜晶表示最後以「滋滋聲」的長短問彭楚盈問題作溝通,翁靜晶直言嚇到毛管戙,翁靜晶指:「彭小姐話畀我聽一個好重要訊息,就係本來約咗個的士司機(證人),佢聽日唔嚟喇,聽日係臨場法庭換咗人,邊個嚟呀,有三個道友,畀咗口供嘅,聽日就會嚟(上庭)。」翁靜晶指當時看過所有口供,都是向同一方向走,翁靜晶表示:「咩方向呢!彭楚盈係一個濫交、吸毒、潦倒、冇錢、不負責任嘅一個人,會造成一個咁嘅形象,所以啲口供都係朝呢個方向,塑造到佢好似廢青咁。其實全部都係假,彭楚盈絕對唔係咁嘅人,其實都幾叻女添。最重要係彭楚盈話完全唔識呢三個人(道友)。」翁靜晶表示與彭楚盈溝通長達2小時,得知不少內情。
翁靜晶驚揭更多離奇事
翁靜晶翌日上庭發現證人果真換人,雖然向法官提出反對,但反而被罵,翁靜晶在庭上盤問三位道友,他們自稱跟彭楚盈是好友的,聲稱常到訪彭楚盈寓所,又曾為彭楚盈慶生。不過當翁靜晶在庭上詢問三位證人,彭楚盈寓所內的間格及彭楚盈的生日日期,他們竟完全答不出來。翁靜晶表示:「點解有三個道友出現呢,因為現場發現有針筒,打毒針嘅針筒,想話佢成日同啲道友一齊,打毒針過量打死咗。其實都好特別,邊個話發現現場有毒品呢,就係方曼生講㗎,同記者講㗎,新聞係有出嘅。咁佢都知得好清楚,點解佢會知有毒品呢?」而令翁靜晶更感離奇的是,此案開庭首日,方老太就不幸心臟病發離世,而審此案的外籍法官在結案後不久亦因急病去世,翁靜晶指這位法官本來已升職,事業平步青雲,非常可惜。