即時娛樂
2022-11-03 15:12:39
独家丨伦永亮赞好MIRROR最欣赏Edan 爆梅姐个唱彩排曾堕台受伤
入行36年的音乐大师伦永亮(Anthony)将于本月26及27日,於戏曲中心举行两场《伦永亮「我是音乐人?」》音乐会。相隔3年再开Show,Anthony形容系缘份到,加上过去3年受疫情影响,令人变得情绪低落,趁仲有体力就要带出欢乐。采访:方骞平 摄影:谭志光 发型:Jam Ng 化妆:Ellen Tam
65岁Anthony转眼入行36年。
Anthony预先张扬个唱中有一part讲音乐人追潮流,会教大家潮语,作为65岁长者的他表示自己潮得起:「我有留意ERROR,睇193(郭嘉骏)做节目主持好有个人风格,讲嘢好似有深度;至于MIRROR 12子个个都唔同,见佢哋好团结,有种摄人力量。」他指队长Lokman(杨乐文)的普通话极之烂,但好好笑,见到佢哋就开心:「我最欣赏Edan(吕爵安),佢弹琴弹得好好,睇得出好用心学咗好耐。」
伦永亮为个唱已准备就绪。
梅姐满口搞笑歪理
Anthony指香港乐坛好耐冇Super Star,MIRROR的出现好似打咗强心针咁,能帮到本地乐坛。因此,他都有畀钱扑飞支持MIRROR,可惜未有机会睇到,但坚持保留门票静待佢哋重开演唱会。
伦永亮仍保留MIRROR演唱会门票,静候他们重上舞台。
伦永亮在乐坛多年,跟合作无间的已故天后梅艳芳、林忆莲、吕方等好老友,又曾于舞台上跟梅姐共过患难:「当年梅姐喺复出演唱会彩排上曾堕台擦伤,加上机关又多次故障,令佢好upset,直至完成头场,佢喺升降台下降同我有眼神交流,见佢感动得眼角有滴泪。」Anthony再爆梅姐有搞笑歪理:「佢成日教我做大牌唔好准时,试过约佢录音,等完佢食晚饭,之后又话肚痛,等咗一晚唔见咗人。佢仲教我『唔识跳舞喺台上就唔好郁,边个话唱快歌一定要跳舞啫?』」另外,他跟忆莲有保持联络,指对方最爱听外国地下乐队,十分前卫,希望她快点返港开骚。
梅姐生前教咗Anthony唔少嘢。