旺角Leica專賣店遇竊 兩賊閃電擸逾百萬相機鏡頭 最貴一支值40萬

售賣大量相機器材的旺角星際城市商場今日（24日）發生爆竊案。早上7時許，一間專賣Leica相機器材的店舖遭人爆竊，入內偷走28支鏡頭及2部相機，約值120萬元。警方翻查閉路電視，發現賊人為兩名男子，相信在商場後門潛入犯案，案件暫列作「入屋爆竊」案，暫時未有人被捕，旺角警區刑事調查隊第四隊跟進調查。

涉事商舖事後在社交平台發文，並公開被偷的相機及鏡頭型號及序號，呼籲市民若在市面上發現有可疑人兜售該批贓物，立即聯絡警方和店方。

本網傍晚時分到場了解，發現店員正於店內忙於執拾清理，未有開門營業。店員李先生向本網表示，今早有人通知老闆舖頭被人爆竊，大批相機及鏡頭被掠走，於是老闆便通知各人並立即趕回店內了解及報警，「本身現場亂晒龍，成地玻璃，最貴嗰堆貨就俾人偷走晒」。

根據李先生提供的閉路電視片段截圖，兩名賊人犯案時身穿黑衫黑褲，頭戴漁夫帽及頭燈，手持鎚仔打爛店舖大門玻璃，之後入內大肆搜掠。

被偷的相機鏡頭中，李先生指有一支二手鏡頭是特別罕有及昂貴，價值約40萬元，「嗰支係50/1.2，60年代尾至70年代頭生產，用天然石同人手打磨，製作過程好複雜，全球總產量好少，大約1600支左右，好受香港收藏家喜愛」。他又指兩名賊人逗留時間好短，估計不足兩分鐘，他們迅速將店內最昂貴的相機及鏡頭擸走，之後奪門而去，「佢哋一入嚟alarm就響，所以好快就閃人，我哋開咗4至5年，都係第一次俾人爆竊」。