張家輝自嘲做導演攞嚟衰難搵投資者 主流電影大把人拍鍾意拍冷門嘢丨獨家

張家輝跟內地導演兼演員馬浴柯繼《怒潮》後，再合作電影《重生》，對於日後再執導可邀請馬浴柯演出時，拍開非主流電影的家輝就大呻搵投資者好難，翻查資料，由家輝執導的2018年的《低壓槽》及未上映新作《贖夢》，兩者相隔至少6年，難怪張導演玩自嘲，「投資梗係買商業片，點會買我嗰啲吖！」採訪：杜杜 攝影：羅安強 髮型: Wong tak chau(黃德洲) 化妝: Midco chu(朱惠芳) 場地:apm

家輝笑言跟馬導合作有意外收穫，「成日傾電話，令到我啲國語都進步咗。」

 

家輝參與馬浴柯執導的兩套電影，下次有意倒轉身份。

 

馬導跟家輝早在2013年《掃毒》結緣，分別演毒犯及警察有不少對手戲。去年馬導首部自編自導自演電影《怒潮》，創作階段已想到家輝，但坦言冇信心可以請得郁對方。「後來經投資人幫忙，家輝哥看了劇本還記得我，兩天時間就說『幫你啦』。」

2023年馬導首次執導的《怒潮》便邀請家輝合作。

 

合演《掃毒》已互相欣賞

家輝在《掃毒》時已對馬導留下好印象，「佢演『段坤』，真係耶穌都留佢唔住（戲中經典對白）！」所以當被邀拍《怒潮》時便認真考慮，「首先知道呢個人係好認真嘅演員，直至有部戲話佢自己寫。」家輝更自爆收劇本後爽快答應，「我唔係嗰啲，你畀咗劇本我，我又唔睇住，然後你問我，我話近排好忙未睇晒，唔知點等你好，其實睇劇本只用你兩個鐘，唔睇就一個禮拜都唔睇啦！」家輝亦睇準馬導對內地巿場認知的優勢，「我都想同多啲新導演合作，希望佢哋有新想法，尤其是馬導係演員，喺內地打滾咗咁耐，相信佢會更了解內地觀眾，想睇套乜嘢嘅犯罪動作片。」

馬導希望下次執導再同家輝合作。

 

家輝和馬導互相欣賞，老友鬼鬼。

 

由於《怒潮》成績不俗，馬導創作《重生》時完全為家輝度身訂造，「將家輝哥、小天（阮經天）、陳國坤和自己的照片，貼在黑板上對住來寫劇本。」馬導延續這班底全因價值觀一致，「我們的審美觀很像，他們在現場不理吃得飽不飽好不好，拍的時間久不久，為電影好的事家輝哥都做，這樣的搭檔特別難得，會很珍惜。」家輝謂《怒潮》合作愉快，跟馬導很啱傾，所以二話不說就答應演《重生》，「拍攝《重生》時，佢唔單止拍得更好，係更加了解要畀乜嘢元素去吸引觀眾，觀眾好接受。」

「沙旺」造型特別，性格又癲，家輝演得好過癮。

 

家輝更開心票房報捷，「戲嘅嘢梗有讚有彈，我哋整體成績好理想，有大戲上映我哋追緊上去，追到過埋《異形：羅穆盧斯》成單日票房冠軍喎！之後繼續攀升緊，就算有10幾部新戲上，都仲企喺幾理想嘅數字上。」問到成功因素，家輝就搞笑話有同馬導講過，「但唔可以喺度講，係我哋變魔術嘅秘密，哈哈！」然後又笑住教馬導點答，「話我哋好彩啫，呢個期間冇乜犯罪動作片！」

戲中有多個造型，家輝最鍾意流浪漢look。

 

「沙旺」造型特別，性格又癲，家輝演得好過癮。

 

角色造型夠爆過足癮

家輝的角色有2個身份，自言拍過唔少劇情動作警匪片的他依然覺得有新鮮感，「角色咁放肆，好有挑戰，我覺得好玩！」對於「沙旺」造型，更加覺得過癮，「佢外形癲，行為癲，但原來佢又係假裝，真正身份唔係咁樣，喺呢條線上面，空間比較大，最鍾意喺差館成個流浪漢嘅造型。」造型亦令他更能放開去演繹，不再理會是否反派，「好難計係好人、卧底，不如演活咗個壞人先，要好保留咁扮個壞人，咁咪失敗囉！」馬導今次演的「巴萊」是非一般奸角，是他刻意為自己安排，「我做演員時冇人信我能演好人，所以今次安排自己做好人，但冇信心一嚟就做好人，所以畀個反轉，呢個效果就好啲。」

馬導演的「巴萊」，表面上是個毒販。

 

家輝提起搵投資者難，講到皺晒眉。

 

既然兩人合作得開心，問家輝再做導演時，會否邀馬導當演員？家輝斬釘截鐵話會，馬導開心回應：「我想呀！」不過家輝表示他通常拍冷門題材，所以開戲有難度，「我同佢（馬導）分別，就係佢係創作成功商業題材電影嘅導演，而我做導演就係咁衰，揀啲非主流嘅嘢，開得成嘅機會難過佢。」馬導又要求家輝搵他演好人，家輝都一口答應，同時又好感嘆：「我啲戲都多數講好人，但呢啲戲好難開，投資方梗係買佢嗰啲商業片，點會買我嗰啲吖！」

家輝直言投資者鍾意搵馬導多過自己。

 

家輝上次執導作品是2018年的《低壓槽》。

 

家輝執導的新作《贖夢》，仍未定上映時間。

 

 

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。