【曾智華專欄】火速提出評稅反對

作為奉公守法一市民，小弟數十年如一日，當收到個人入息稅單時，必會第一時間立即繳交，絕不會拖拖拉拉到死線時才郁手。

早年曾經被同事笑正「豬揼兜」，為乜唔攞十萬八萬元稅款先存定期，賺返筆利息先呢？

性格使然，怕煩，從來最憎欠任何人錢，包括政府及銀行，故此，堅決鋪鋪清，一個仙都不欠任何人（早年曾同時捱三份工還樓貸），繳款後毋須再心掛掛，怕遲交被罰。

我有幾位老友以為自己好醒，拖呀拖唔交，結果過咗期才醒起，大鑊，冇人情講，即罰一成欠款數額的附加費，事後揼到爆……

講完。不過，今年小弟出現收稅單後冇第一時間交費的破例情況，點解？因見到個銀碼嚇一跳。

原因正是去年接咗份外判工作，多咗筆額外收入，當然照報。一報之下，弊傢伙，立即交兩份稅，一份是應交的，一份是預繳的。真係揸住有啲手震，因從冇心理準備要交咁多，失預算，點搞呢？

揸住張稅單睇呀睇，咦……有項叫「你的權利」噃。標題是「對這評稅提出反對」。內容指出，若納稅者對評稅有疑問，必須在1個月內以書面向稅務局提出反對，並列出理由。若1個月內未行動，即使你之後提出反對，也必被「先斬後奏」（即先交全部稅款）。

我點搞？當然第一時間執筆（已經N年冇寫過信），向稅務局長呼冤，聲明去年的外判工作，只屬一次過，今年不會再有，故懇請將預繳的一項抽起。

好彩有做又做得精準，果然有效。兩個星期後，再收到稅局通知，「關於暫緩繳納薪俸稅暫繳稅」（使唔使水蛇咁長）個案獲批。

即時交少幾萬大元，嘩……舒服晒呀！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。