【曾智華專欄】「國慶盃」何須刨馬？

今日國慶日，馬照跑，非常開心，十場草地賽事，戲碼雖屬一般，幸而有場三級「國慶盃」頂住。不過，此場出馬相當疏落，只得八匹，其中三匹來自呂健威馬房，此馬房今日有兩場出三隻，肯定有布局呢！

大家可記得上次「慶典盃」，我畀陰謀論馬評老友「馬王輝」窒到飛起？因小弟正頭正路貼「潮州精神」，而此馬屬公眾全熱門，不足兩倍開跑。結果？三甲都冇！

輝哥分析：「碌Sir，『慶典盃』咁政治化，其他馬點敢去，咁唔識Do呀？一定要讓路畀『中華盛景』，咁先至政治正確嘛。」

言論自由，言論自由，當然包括評馬。

好啦，再論政治，今日場「國慶盃」遠遠比「慶典盃」更更更重要，若依輝哥思路，好鬼易度啫。

今日小弟一於唔刨馬，就以政治論去分析「國慶盃」，睇睇會否符碌撞中。

首先，要飛起啲九唔搭八馬名出賽馬，例如「水晶酒杯」、「電氣騎士」及「緊張大師」，完全與國慶氣氛拉唔上關係。

「美麗第一」又如何？名字不錯，有機入位。

「狀元及第」？有點風馬牛不相及，但中性，也可以入位，但不會是正印。

「勝不驕」，近嘞，因中國如今走勢，以國力論，只得美國在前面，而美國擺明懼怕咗中國過頭，影響全球獨一無二霸權，故明刀明槍用盡手段多方攔阻。事實，中國已在不少領域開始勝出，但不宜驕，故「勝不驕」合形勢。

「賢者無敵」，也是中國人喜歡的心態，但此馬屬鬼佬馬房，若勝出，唔係好啱路數。

「魔術控制」又如何？此馬上次勝來深不可測，明天初遇強手，應仍冇有怕。

「龍之輝」，馬名Fit到爆，龍正是中國。

政治論分析，呢場應該是「龍之輝」單Q「魔術控制」，深具意義，然後就到「勝不驕」了。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。