騰騰震散戶不宜買股｜曾智華

從來對馬迷嚟講，有馬跑就有希望（雖然十次跑九次輸），同理只要有股市，投資者就有希望。但股市不同賽馬，基本你只要選中優質股票，在合理價位吸納（希望你識計啦），放埋唔理，正常情況下雖會上上落落，但起碼一定有息收，兼且在公布業績理想、又遇上升市時，即會有相當可觀利潤。

不過，股民十之七八仍是會蝕，點解？因佢哋買股似盲俠放飛劍，亂買完全不懂研究；另外知啲唔知啲，以為市盈率低、息率高就等於好，對公司業務、前景、管治、市場大趨勢及政府政策是否有利，全部一嚿雲就買，如此當然變水魚，股市大鱷唔劏你就奇。

大升市只是歷史重演再重演

香港股市中有2,000幾隻股票，大部分係垃圾（我話嘅，歡迎對號入座！），絕對是睇都嘥氣。就算係藍籌股，也非隻隻值得投資。上周大市升到個個「澎澎聲」，其實只不過是N咁多次發生過的歷史重演再重演。

記住，恒指升並不代表所有股票升，就算是藍籌股，也非隻隻跟比例升。咁升乜？本欄讀者應知，唔記得我再重複，正是升幾隻權重股。即大戶掃呢幾隻，就會令指數飆升，製造一片興旺景象，包括滙豐控股（005）、騰訊控股（700）、建設銀行（939）、中國移動（941）、美團（3690）、京東集團（9618）、阿里巴巴（9988），以及小弟一再提醒大家接近220元就要掃貨的港交所（388）。

港交所獨家開「賭」 夢幻爆升

今個爆升回合，中正我不停提大家的港交所，因佢乃獨家開「賭」的莊家股，有政府政策傾斜益晒，股市爆升，成交大增，立即豬籠入水，肥到着唔到襪！其升勢真的夢幻，月中仍低見221元，及至上周五已經爆升到308元。（編按：港交所周一再升至326.2元）

小弟讀者深知我長揸幾隻股，包括中電控股（002）、港鐵公司（066）、港交所、領展（823）及國泰航空（293）。

在今年市殘時，騰騰震老友個個話香港冇前途，經濟冧檔，故爭相不理好醜掟貨止蝕，所有實力股包括以上5隻分別低見55.4元、23元、212.2元、29.75元及7.6元。

我又如何，當然不為所動，反之一到心中底價（如港交所）就加碼。買股不用多，但必須知道自己買的是甚麼股，為甚麼買，平均價及抵買價又在何處？

資深傳媒人 曾智華

相關文章：

9個月三中港交所｜曾智華

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。