專欄│板凳高質可助車路士奪冠

車路士等緊第一個冠軍，其實只係等緊兩年內嘅第一個冠軍，上屆聯賽盃失利，睇嚟今次唔會再發生啦！車路士球員適應馬利斯卡嘅陣式，組織非常流暢，數數下車路士已經3勝1和1負，戰績非常唔錯，咁點解今季咁有信心車路士可以攞到一個冠軍？

最關鍵係板凳深度，當去到季中好多球員會無力，加上現今賽程要應付咁多場賽事，每名球員場均都要踢50場，板凳上可換出嚟嘅人就係最關鍵。車路士後備嘅四人攻擊線，尼干古、柏度尼圖、梅迪歷及祖奧菲歷斯，幾位都唔係一般球隊可以擁有嘅球員，每當球員需要輪換嘅時候，佢哋都非常可靠。

聯賽盃對巴羅，尼干古帽子戲法證明咗車路士嘅後備球員係非常之高質素，如果去到季尾有咩球員傷咗，佢哋可以隨即代替，試問其他英超19隊可唔可以有呢個板凳深度？

再加上季尾一定有啲球員會受傷，呢個係無可避免，如果可以唔需要適應而完全套用到陣式內，車路士睇嚟都係最有信心嗰一隊。今屆歐協聯、聯賽盃及足總盃應該都可以受惠於呢個板凳，不過冠軍永遠都要講啲運數，但係睇嚟今年車路士終於可以修成正果啦。Willhappy

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。