【曾智華專欄】抌心抌肺練馬師

馬圈，一如商業世界中的任何圈，競爭激烈（慘烈）外，更有一個現象，是撬人才。

即A公司為增強實力，最易又最快的方法，是從敵對公司之中撬人，一方面增強自己實力，另一方面搞弱對方，一來一回，增加極大優勢。

馬圈世界有兩個範圍經常出現心狠手辣的撬，分別為騎師與練馬師撬馬。

昔日最犀利又唔怕面懵為韋達，點解佢能做足13屆冠軍騎師？當然因為騎功超群，另一其他騎師有所不及的，為相馬眼光勁，一發現有好馬潛質未盡露，立即去電馬主及練馬師，大力撬，憑三寸不爛之舌及誠意，苦苦懇求對方比佢一試。老老實實，你係馬主或練馬師點反應？堂堂冠軍騎師話可以替你未W的馬W到，怎可能推！

就此撬吓一隻，撬吓又一隻，就掃下13屆冠軍了。

至於練馬師，撬馬的唔係冇，但冇韋達及潘頓一類人馬咁密集。

其實馬匹轉倉乃等閒之事，A倉唔得，試試B倉倒也合理。但對練馬師嚟講，畀人拉馬雖然冇癮，但亦不會太心痛。不過，若拉着你隻鎮倉寶，咁就真係攞大命，冇面兼失去百萬元計獎金。

今季最抌心練馬師必為黎昭昇，辛辛苦苦引入咗匹犀利短途貨色「魔術控制」，點知錯誤安排第一場唔跑較易的沙田直路，而走去跑急彎的快活谷，結果釘釘，即被拉到巫偉傑馬房。冇乜點大做功夫，只報直路一千，立即按韁贏馬。若你係黎超昇，會否嘔血？

今日第七場三班千二米，羅富全出鎮倉寶「天天同樂」，上次行返嚟贏被加十二分，肯定大賽棋子。如此布局，羅廄豈會只W一隻吖，除「美神來」外，隻隻投一票過關啦。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。