【曾智華專欄】「四哥」廚功好得

四哥係邊個？當然並非謝賢啦，而是一位資深潮州菜師傅兼老闆。

好玩在若睇佢個真名，分分鐘以為是位女性，名謝苑君。我之前唔識佢，之後必定不停搵佢。

話說半年前，有對在長沙灣開公司的姊妹花Rita及Polly，知小弟為食成性，不停想試新地方，故提議：「碌Sir，有冇試過梅花邨小館？相當掂，就在我哋公司附近，故變成飯堂，此店走中級潮州菜路線，有機會幫襯吓啦。」

聽完冇特別上心，結果上周又有一位任職理財顧問老友波波，因代理的香港年金推出30萬元特惠計劃後，嘩，即時做到冇停手，豬籠入水，當然要請食飯慶祝，竟又係提議去梅花邨小館。

咦，咁就要試吓喇。

菜單傳來：潮州凍紅蟹、滷水鵝肝拼盤、灌漿蘿蔔、原隻胡椒豬肚湯加第一刀粉腸、花螺鹽焗雞、一帆風順大鷹、客家燜豬肉、方魚炒芥蘭、鹹魚雞粒炒飯、兩面黃、反沙芋。

　老老實實，在長沙灣開店的，必定不會是一級名店，地區及客路問題也。

日子到，入門口見一大隻先生，原來正是經理威哥，服務友善又熟練。全店爆滿，今時今日市道看，已是信心顯示，令小弟開始對出品有點期望。

先上紅蟹，大大隻，突然大廚四哥出現話：「碌Sir，下次食細隻啲，更鮮更甜，改試凍瀨尿蝦仔也可。」

專家推介，信十足，下次跟！

之後轉身返廚房，然後一味又一味精品上枱，全部質素最少中上至頂級。

滷水拼盤收晒貨，難得有幾片大墨魚，鮮味濃郁具O趙頭；花螺鹽焗雞點火上，玩野搶眼。

食到尾，死就死，最多翌日禁食，點解？因想來碗白果芋泥。油光閃閃，正！呢餐之後，肯定好快再搵四哥。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。