【曾智華專欄】搞掂泊車與廁所先講啦

上周本報「工商新聞」報道，九龍城廣場有新搞作，音樂人以每月60萬元租下3萬呎巨舖，準備打造成餐飲及潮流玩意中心。

老老實實，小弟真係要祝佢哋好運。

時光倒流30年前，大群香港電台同事，非常喜歡到九龍城廣場逛，因夠新夠潮，食肆又多選擇，泊車非常方便，故此，不少日子的午晚餐皆在此搞掂。其時，啟德機場仍在，九龍城人流旺爆，間間舖大把生意唔憂做。

但踏入1998年，晴天霹靂，因機場搬到赤鱲角，而附近的又一城、樂富廣場及荷里活廣場紛紛落成，全部更新更潮更多車位，從此，九龍城廣場即由「大婆」變「二奶」，之後再變「三奶」，冷冷清清。

大業主又唔爭氣，不再投資，反之將其出售，轉手再轉手後，仍全無起色。

到2017年，基於香港地產火紅，有中資財團雄心萬丈接手，入紙城規會將其改建成高檔商住中心，諗住趁地產狂潮刮一大筆。

點知⋯⋯申請幾年後終獲批准，可建850個單位。若在2017年，當然發達，可惜是2020年了，疫情開始，之後⋯⋯

九龍城廣場大業主根本無意經營商場，當然不投資翻新及保養，結果長期有點死吓死吓感覺，行入地下廁所，極之唔開胃。

而泊車則因好多商戶唔願畀車位費，對揸車消費者當然冇晒吸引力，相比鄰近商場的進取，變日日在捱打。

如今竟然有人出60萬元月租簽6年約，意即重建計劃就算不是泡湯，也變長期押後，繼續拖拖拉拉情況下，雄心萬丈的新租客，會面對乜情況呢？小弟忠告，想有生意，唔該先搞掂廣場內的洗手間及改善泊車政策，否則⋯⋯肯定又變嘥料。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。