彭秀慧逆巿自资搞舞台剧：唔知仲有冇机会 去丧礼多过去婚礼突然睇化晒丨独家

相隔10年，49岁彭秀慧再度自编自导自演自资全新舞台剧独脚戏《失忆【谅解】备忘鹿》，巿道低迷通街吉舖，仍够胆自资制作，彭导坦认有压力。近年经历妈妈患脑退化离世，好朋友又相继选择先行一步，面对生离死别，彭秀慧自言心态唔同晒，反而更珍惜每次创作机会，“我经历过生死，人生睇得好化，当下系好紧要。”采访：杜杜 发型: Jo Lam@Salon Trinity 化妆: Iris Luk 服装: Maje 场地:@momento

彭秀慧这几年思想变化很大，很多事已不再执着。

 

彭秀慧以鹿角造型，为《失忆【谅解】备忘鹿》拍摄海报。

 

《失忆》讲述没家庭的女主角突被裁员，慢慢发现记忆变得混乱，要赶及处理跟妈妈的心结，剧作表达的就是整理回忆的过程。故事启发自彭秀慧患脑退化的妈妈，“失忆系几残忍，呢个系我创作嘅起点，失忆即系忘记，以为忘记咗就解决咗啲嘢，其实仲有啲结未解，𠮶种解决系谅解，更加可能系明白，作为女人同妈妈嘅关系好纠缠，互相明白，但又互相唔谅解，好奇怪嘅关系，我都经历过反叛唔明白，甚至唔钟意到极点，但时间一过已经去到妈妈当日年纪，思想或者容易啲代入。”

彭秀慧母亲于2022月9月病逝，令她反思了很多。

 

彭秀慧很珍惜跟88岁父亲的相处时光。

 

唔知仲有无机会再做

相隔10年再写独脚戏，虽然攞苦嚟辛，但彭秀慧认为只有这种形式，才能够表达所思所想，“正如跑马拉松，点解攞苦嚟辛？！你知跑得过，一切都系值得。”彭秀慧上次独脚戏《Tiffany》是讲婚姻，近年她发现去丧礼多过去婚礼，所以更有冲动去创作，“呢几年经历咗好多事，好多几大嘅转捩点，呢个年纪处理离别、死亡，唔止去丧礼仲搞埋，加埋个世界变得好夸张，又要处理自己开始迈向下个阶段，睇嘢唔同咗，喺呢个空间、时间，有少少逼自己做，有啲嘢唔做可能就会过咗，唔知下次仲有冇机会、体力做，所以要写囉！”

彭秀慧上个独脚戏《Tiffany》以婚姻为主题。

 

好友林皓霆（Charles）去年10月先行一步，彭秀慧好难过。

 

撞城城歌名问准小美

剧名《失忆【谅解】备忘鹿》跟1995年小美填词的郭富城歌曲《失忆【谅解】备忘录》很相似，彭秀慧坦承两者有很大关连，“件事太神奇，个名一路kick住我，点讲都好似太沉重，我唔钟意入到剧场唉声叹气，于是上网打失忆，就出咗郭富城只歌，再听就发觉听咗咁多年，原来冇了解过歌词，我用唔同角度去解读首歌，最初想讲明白，但系寻求多一种情绪就系谅解，但谅解嘅前题有愤怒喺裹面，个歌名畀咗啲嘢我。”而“备忘录”变成“备忘鹿”，她解释当时脑海弹出鹿，她好喜欢的动物，“鹿代表善良、智慧，有种与世无争感觉，我谂回忆摆喺个脑，记忆走咗会走咗去边？！变咗只角，备忘鹿嘅鹿角，系象征嘅意义。”

彭秀慧的剧名已问准小美，她亦有去欣赏城城演唱会。

 

剧场10年庆幸未输过

巿道低迷下自资制作，彭秀慧坦认有压力，“成日都唔识惊，唔知系好定唔好，但系我以前一路都系咁做，由第1次自资系申请政府钱，攞咗3300蚊起动费，之后就好似个师奶仔咁，打麻雀赢咗啲钱唔使，下次再做就攞出嚟，都搞咗10几个骚，每次都谂要储多啲本，唔知下次会唔会输。”幸好她是个“长胜将军”，“坦白讲每次票房都唔错，由2005年开始到2015年，10年时间做咗好多独脚戏，虽然作品得4个，但不断重演，好努力去经营，储咗班颇忠实嘅观众，就算2015年后做咗电影，都会挂住剧场，仲想将睇电影嘅人拉入剧场，同剧场连系好深。”

彭秀慧自编自导自演的独脚戏《29+1》，令她知名度大增。

 

2017年彭秀慧将《29+1》改编电影，由郑欣宜主演。

 

拍成电影版的《29+1》成功带了不少电影观众入剧场，但她认为社会运动、疫情令所有事大洗牌，所以抱着做得一次得一次心态，去行未来的创作路，“之后系点我都唔知，有机会再做舞台剧又好，再做电影又好，我经历过生死，人生睇得好化，当下系好紧要。”她庆幸能够再将想法放入作品，但会提醒自己不要被电影导演身份影响，“大家叫彭导，我会讲唔好畀呢啲嘢雾化咗自身，导演都系要做作品，指挥千军万马都要做想讲嘅嘢，跳返去独脚戏，我系演员，剧场系提返我个本质，做导演孭住好多嘢，唔可以喺现场崩溃，但舞台上我仲可以自由呈现任何状态嘅自己。”

彭秀慧认为舞台剧和电影很不同，两种创作模式都不会放弃。

 

2018年，彭秀慧凭电影《29+1》夺金像奖新晋导演奖。

 

---------------------------------------------

>>>立即浏览【移民百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。

>>>即读【新移民专栏】：新移民第一身经验，与你分享当下年轻移民生活日常大小事，即读“新移民专栏”。