【曾智華專欄】阿寬談的《那場戀愛》

阿寬係邊個？年輕讀者未必知，資深讀者一定知，正是早年日日在報章寫女性心態的陳慶嘉。

上世紀80、90年代曾與阿寬在香港電台做同事，佢乃秘撈之王，因為人隨和，創作力強，最擅長觀察現代都市人心態。呢種透視力，並不太多人有，故此有大量「市場需求」。當年夥拍鄭丹瑞，推出《小男人周記》，狂受歡迎，由電台爆到電影，大收特收。

當年小弟曾認真地玩佢：「喂，你兜友，簡直是男人型女人心，肯定好多女性都唔夠你了解女人，尤其涉及愛情的矛盾心態。」

何有此言？因小弟日日追睇阿寬專欄，專寫都市女性，題材永不枯竭，犀利，令人睇到會心微笑，冇得唔服佢掌握女人心的功力，真的非比尋常。

事實陳慶嘉做電台，天地太細，認真嘥料，故最終投身電影圈，終可大展拳腳，創作出N咁多賣座城市小品。

最新上畫《我談的那場戀愛》，我當然第一時間入場，睇睇佢對現代城市女性，又有乜新發現。

果然厲害，完全理解香港有不少非常叻、在專業上可能是女王級的單身貴族，其實好易受騙。阿寬通過電影指出，呢啲女強人被騙，並非完全唔知，而是根本在半知半不知中，沉醉在這種「如幻似真」的愛海內，不知不覺間，花上千億萬元身家亦不後悔，兼且絕不會報警。

這種劇情，是否與多年來香港發生過的「女富豪騙案」極之相似，熟口熟面？

騙徒其實個個是心理學專家，完全掌握人性中的貪婪、無知、恐懼、寂寞及好色，再度身訂造，為目標設局。《我談的那場戀愛》並非甚麼經典大製作，但我一邊睇，一邊會心微笑：「衰仔的功力越來越深厚喎。」

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。