【曾智華專欄】「駟跑得」今晚Win得

今季賽事，我一再提醒大家留意廖康銘，熱身一季後，明顯進入狀態，恍如勁馬開閘彈出，快快手已執幾場W。

另有必須品題的，為廖廄畀的例湯貼士。

凡賽馬日，大部分馬房都會向旗下馬主發放當日貼士，呢類通街知的料，多數由馬房副練執筆，加加埋埋，其實與各大報章的貼士無大分別。事實，練馬師又點知其他對手部署呢？當然單靠估估吓。

不過，若去到自己出的馬，則冇可能一嚿雲，故此，若冇畀而W出，必被全世界噓爆「收埋食」，呢吓真真罪大惡極！

其實練馬師十之七八非常小心貼自己的馬，故此，明知得都只擺二三位，戴定鋼盔也。若去到擺頭的，肯定已是信心爆棚。

間中夠膽擺頭的有羅富全及沈集成，但多數是一倍多的貨仔，真係使鬼你貼咩！

好嘞，如今多咗個廖康銘，真正夠膽擺旗下馬在貼士中行頭。例如首兩次賽馬，提供三隻，分別為：一、祝願（2.2倍）；二、精選威（3.6倍）；三、駟跑得（5.6倍）。

結果頭兩隻輕風送爽W出。第三隻？因同場有大老虎「喜蓮勇略」，殺聲震天，熱到兩倍，擺明信心十足，而同場的「駟跑得」閘前為次熱5.6倍，賽事的「江湖規矩」為絕少大熱次熱一Q返來。既然「喜蓮勇略」信心爆棚，咁⋯⋯「駟跑得」當然縮啦，入直路兜大彎交出個第四
算數。

不過，隻馬咁勇，食得當然唔會嘥，今晚再上陣兼抽得靚檔。睇睇同場對手不多，能有威脅的，應是「久久為攻」、「時時稱心」、「奮鬥心」及「極速奇兵」。

呢場小弟投注策略為用「駟跑得」做二重彩複式膽，拖以上四隻，再Q及PQ拖以上四隻，10蚊注，總投注160蚊，入直路應有得嗌！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。