【曾智華專欄】大雞收檔，細雞湧現

多年前中央頒布指示，在廣東省不少城市推行「騰籠換鳥」政策。我認真一嚿雲，唔知係乜東東，於是四圍問認識的國情專家。

「碌Sir，意即將原本的雀放去別處，騰空個籠，養隻更正（會啩？）的雀。」

明！即是將1992年鄧小平南巡之後，如雨後春筍的低檔次工業，例如污染、勞工密集、廉價生產、低技術⋯⋯的工廠，全部由深圳、廣州、順德、東莞等搬到荒蕪的廣西，騰空已發展的大城市，做高增值工業。

說來，香港是否又在進行一個「騰籠換雀」過程呢？你話呢？效果又將會如何？

其實香港的飲食業也在「騰籠」，但飛走的未知是烏鴉或是鳳凰。

近日不停收到又執又開的消息，不少幾十年老字號、一代又一代傳承下來的香港名牌話執就執，小弟飲食江湖闖蕩多年，從未見如此現象。不過，永遠如是，一雞死一雞鳴，也有雞「復活」的，例如做肥鱔蒜子煲及粉絲蟹煲好食到「刮穿煲」的基哥，休業五年後重出江湖。

散班不久的鰂魚涌名店「合時小廚」，樓面靈魂嬌姐根本未停過，呢邊執笠時，嗰邊已有位三十多年熟客投資，要求嬌姐組班。三兩吓手腳話咁快，新店10月4日開張，打正招牌叫「嬌姐小廚」，位於灣仔交加里，以前的「老巴剎廚房」舊址，肯定租金都唔少嘢。

咦，為乜呢邊個個話飲食業死硬，冇得做，嗰邊又一間一間開檔的呢？

仲有一間「大雞」收檔，正是有57年歷史的銅鑼灣百樂潮州老舖，唔再頂嘞。不過，聽講貝老闆唔頂「大檔」啫，改開「小檔」喎，另搞更精緻、更高檔的私房菜。因香港仍有大班畀得起錢的嘴尖友，為美食，不惜腰間錢也。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。