【曾智華專欄】特朗普輸畀自己

上周三特朗普決戰賀錦麗，除非你是狂特「死粉」，否則冇可能話佢表現更佳咁冇理性，不過，事實證明美國仍有三成這類人。

我多年來公開表示討厭特朗普，因佢的傲慢、爛撻撻、毫不掩飾肆意犯法、口出狂言自私自利……兼且將美國傳統優良仁愛文化（起碼有一面如此）肆意顛覆（當然並非全部），例如唔同對手握手，輸咗唔認兼拒絕出席對手宣誓大典⋯⋯這一切，以西方的傳統衡量，實在離晒大譜。

不過，佢仍有超過四成美國人支持，當然有深層次原因。可惜睇住美國今日的撕裂，真是國運堪處。

小弟長年做傳媒，亦主持過多次競選論壇（上世紀80年代至千禧年，香港選戰相當激烈），對出戰者的策略掌握一二。

故此，上周初與老友分析兩大候選人之戰，我的定論是：「賀錦麗贏硬！因佢首先勝在年輕兼喜歡友善的笑，已給人先入為主良好形象。反之，狂特成日想食人咁款，開口埋口炒人魷
魚（You are fired！），令人難堪唔使本的霸王性格，產生強烈對比。」

所以，小弟扮演賀錦麗智囊，制定辯論策略：一、全程溫文地微笑，只用眼神反對狂特，千祈咪鬥嗌搶咪，以免有失斯文；二、篤佢死穴，例如以事實指出佢視法律如無物，無恥兼道德敗壞，眾叛親離冇班底⋯⋯主要搞㷫佢發火，因特朗普一發火，就會失控兼亂嗡；三、必須突出佢藐視女性、其他種族及新移民的潛藏意識（結果摘出亂屈人食貓食狗食寵物的荒謬失控言論）。

賀錦麗的智囊滿是精英，只要主角肯聽肯跟，已贏一半。相反「狂特」一貫「叻我至叻」心態，乜人忠告佢都當耳邊風。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。