【曾智華專欄】廖康銘隨時一鳴驚人

新馬季跑咗兩次，講吓練馬師。初步睇，爭冠軍的應是沈集成及希斯，另外，當然要看蔡約翰的意願，馬會想佢留到75歲，本來條件多多，但以蔡神仙往績，要合資格易過借火。睇佢手影，還是一如以往，11月才起動，到時就知佢會否去馬。另外廖康銘今季應可取得「最佳進步獎」，這位斯斯文文、經常微笑的練者，曾替澳洲兩大殿堂練馬師效力，分別為甘明斯及活侯夫人，期間掃盡級制賽大獎。來到香港，熟習環境後，今季肯定開始發功，旗下有六十二匹馬，有十多匹潛藏未露，隨時一鳴驚人。

明日賽事，研究第三場第四班千二米，十一隻，先飛起五隻，包括「財駿」（快活谷馬）、「威德勇士」（未知競賽為何物）、「燈胆皇」（出四次都輸到甩轆）、「廚師發辦」（上季尾場仍見上力麻麻，衝刺力弱）、「快活英雄」（只跑過一場，走勢幼嫩，要等）。

剩下六隻，「全城帶勝」曾在五班勝同程，但勝出後加五分升班，即坐馬監，對上兩次跑包尾，又是飛得一族。

羅富全新馬「美神來」，海外在平庸賽事中一W一Q兩P，全入圍，但水準不高，到港後兩入第四，今次最多P。

剩下四隻，全有機會W。

首選廖廄「河好運」，高質，新馬插四班，出三次皆近，分別為二、三、四，今次又畀潘頓霸住，起筷喇。

次選韋廄「勝多多」，呢隻馬令丁冠豪瘀爆，因出六場全食白果後，一拉去畀韋達練即入Q，如今再出，必又前列返來。

三選姚廄「綠族威」，上季臨尾五場沙田草地，兩Q三場第四，只差未W過，剛剛霍利時在港，聲仔必搏甩髀，在老父面前威威！

冷選「果然僥倖」，上季一W，正是季初第一場千二米，可能「歷史重演」。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。