【曾智華專欄】船記贏在團隊精神

一個家庭、一個機構、一個城市、一個國家，想衰，好易，大家自私自利，以為自己啱晒，唔搞團結而搞鬥爭，即可「勝利完成任務」，日日家衰口不停。現今全球N咁多例子，唔使我舉啦。

不過，家庭、機構、城市、國家，想好，極難。因要排除大量負面人性，然後，個個放棄自私，一心願意為最高大利益作出貢獻，呢種情況，絕對絕對罕有。

飲食界尤甚。股東生意的，十之八九最後互相猜疑，導致不和。然後，廚房樓面又頻頻出現這樣那樣的矛盾。另外，小弟也幾次目睹，樓面經理與主任情緒失控，初則粗口橫飛互片，繼而動武（在客面前），搞到要報警。

點解上下一心咁難？你話呢？

終於畀我搵到一間，正是幾年前開業、一年即攞米芝蓮的灣仔「船記」。

呢間店勝在有位「母親型」的樓面負責人，名Shirley，做事上心上腦，人打工，佢打工，打到好似間食肆係佢咁款，肉緊萬分，對客人，尤其熟客，非常周到，做足100分。而經理張洪清也如是，不過冇Shirley咁熱烈主動啫。

樓面掂，但難得佢兩個絕不領功，客人一讚就話：「各位，功勞都是三位廚房大將軍的，包括燒味部和哥、點心部順哥、大廚Dee哥。」

老實，商業世界，尤其平起平坐的打工仔，爭功勞我就見得多，讓功勞實在絕少，點解Shirley有這種胸襟？

船記能夠成功，我的觀察，非常主動又上心的Shirley率先搞團結，而幾位低調大男人又受，結果就能在淡市中殺出彩虹。

其他店紛紛結業，船記則擴大做，剛剛由船街坐100人的小舖，搬到合和中心坐300人的巨舖，重錘投資千萬金元。

睇別人成功，好易，其實？你試吓做畀我睇吖。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。