【曾智華專欄】快活谷「山埃」 第一擊

上周日馬季開鑼日，雖然天公不作美，但馬迷話之你，前仆後繼踴躣捐輸創紀錄！

今季湧出好多賽馬網台，有的認真做，有的求求其，百花齊放也質素參差。香港馬迷十萬計，做得好的，例如《賽馬日在線》，必有前景，廣告湧來。

反之，做得Hea吓Hea吓，冇人捧場，也不會損失太大，總的就是——博得過。

但賽馬節目一如所有節目，主持人是靈魂，若果有魅力、有料到，拍檔又能融合，再加上製作方面提供馬迷所需一切數據，咁真係想唔成功都幾難。

今季小弟直播時仍會黐住星島集團的《賽馬日在線》，因幾位主持已做出默契，互相融合，有晒感情，適當時候互窒冇問題，咁就有火花，當娛樂節目聽及睇皆可以。

今晚本季快活谷第一擊，且看小弟提供的是否「山埃」，係就Sorry，中就大家繼續捧場可也，主題研究第五場四班一千米賽事。

呢場出足十二隻，但有幾匹唔使睇，包括「超強六十」、「怡昌精神」、「鋒王」、「祥勝力駒」及「小小吾駒」，全皆未見有何往績表現。

一千米有過表現的，部分因分數太高，在坐馬監，最多只能入P，包括「開心馬」、「鑽石寶寶」、「電路七號」及「胡椒軍曹」。

剩下三隻，頭馬應在其中：

一、「必先生」。老馬利季初，7歲未退役，應仍有一W在手。上季初出一千米即W，之後全季遊魂，冇再跑同程。開季嘞，再報一千米，心意明顯，必須預佢。

二、「運來勇士」。伍廄鐵馬，上季出十四次，一千米一W兩Q，再W有難度，但入Q機會相當高，5歲當打也。

三、「極光彗星」。我捧呢隻W！上季尾轉跑三次同程皆Q，黎昭昇冇「等」的本錢，去硬，一於WPQ二重彩攞佢做膽！

以上三匹皆排外檔，必好分。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。