【曾智华专栏】畀超级市场送货玩残

做人做事做生意，最重要系乜？正是信誉。当你建立咗一个“我就是信心”品牌时，真真条条大路通罗马。点解？因一般普通人与营商者，皆冇“建立品牌”这个概念，反之，过咗海就神仙，呃得就呃，心谂，鬼叫你信我咩！

后者最多出现在“预先收费”的公司。无论是健身、纤体、美容、按摩、减肥、租乜租物，总之，要求你入会并预先缴费（当然话有大折扣）者，能够由头到尾履行承诺者，你话有几多？

最近又一名牌健身集团话执就执，买咗佢会籍者，真系喊都无谓。

今日小弟有点㷫，并非畀人呃，而是畀一个著名超级市场点到冇晒瘾。

事缘我不时有活动需要买酒，为免自己抬去会场，当然安排送货。最近帮衬T超市买一批红白酒，写得清清楚楚收货人姓名地址电话，找数时问收银员会几时送。

“先生，若跨区，10日内送到！”

为稳阵，我提早咗12日落单，相信咁大个集团，不会甩辘啩？

惨，我对佢有信心，结果点？第9日，去电酒家问收到酒未？答曰：“未㖞，曾先生。”

到第10日，T超市承诺送货的最后一日，又去电酒家，同样回答：“冇酒㖞，曾先生。”

我其实好好脾气（系啩？），立即亲身到超市揾经理，一五一十讲完，佢好似唔紧唔要，打咗个电话，回应：“应该好快送嘞！”

“X经理（佢挂住个名牌），你集团承诺10日内送货但冇送，我个大型宴会随时畀你玩残，冇酒点收科？咁嘞，请立即退款，我再自己安排，不过，声明必定向你母公司集团投诉你及你公司，毫无信用及唔紧唔要处理手法！”

呢招有冇效？当然有！翌日早上立即送到。

但经此一役，日后仲帮唔帮衬佢呢？

---------------------------------------------

>>>立即浏览【移民百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。

>>>即读【新移民专栏】：新移民第一身经验，与你分享当下年轻移民生活日常大小事，即读“新移民专栏”。