【黃庭桄專欄】藝術識乜吖

入戲院睇電影，不外乎想暫且逃離繁囂都市，給自己個多兩小時的獨處空間，不用覆短信，不用劈酒應酬，也不用咁辛苦掛上假面具，輕輕鬆鬆投入電影的故事裏，跟男主角一起邂逅心儀女神，和單親媽媽一起眠乾睡濕，也陪伴白髮婆婆送別廝守半生的老伴……

看周星馳和王晶的電影，無無聊聊笑餐飽，是減壓靈丹，散場時真的會感覺到，肩頭上的擔子好像卸下不少。

不過有時候，人總會附庸風雅一番，扮吓高檔，會入場睇藝術電影，然後在友儕間的飯局，化身影評人，高談闊論一番，引得友人讚你兩句：「嘩！你好有品味啊！」

話明是藝術電影，意味著我等凡夫俗子，根本不會明白導演在拍甚麼？編劇想帶出甚麼訊息？總不能扮晒高深，懶叻去揶揄身邊人：「乜你睇唔明講乜嘢咩？唔係啊嘛！」

我試過睇一些挪威藝術電影，挪威話不是問題，因為可以睇字幕追劇情，但講到拍攝手法，真的恕我修養不夠，未明箇中含義。

大佬呀！鏡頭影住沙灘，浪捲來，又捲去，如此角度竟影足成分鐘，冇人行過，連一隻狗影都冇，更加沒有任何旁白，咁即係點先？你至少都影住隻蟹仔在沙灘爬下爬下啊！

然後有時會影住男主角在屋前花園修剪花卉，這棵剪下，那棵又剪下，咁就剪了幾十秒，這一幕是漁農處特約贊助嗎？

當看完一齣內容空洞懶藝術的電影，是一趟受苦之旅，我會強烈譴責自己：「早知走去做腳底按摩，都叫做對身體有益吖！睇完垃圾電影，真係嘥錢嘥時間。」

做人很簡單，只想讓自己笑一餐，明日愁來明日才去負擔，你話啱唔啱？

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。