【曾智華專欄】好鬼好笑Vs.唧都唔笑

兩星期前有幾位老友推介：「碌Sir，快睇內地套收到票房爆炸的《抓娃娃》，好鬼好笑，又有意義，奪得今年暑期票房冠軍，收成幾十億元，絕不簡單，香港8月底上映，相信也應橫掃票房，實在值得推薦。」

以上的票房推論，可能香港院商有同感，故此一上畫就密密排場次播放。點知⋯⋯又一次應驗內地狂收電影香港票房反高潮的現象，要用博士論文才能解釋原因了，究竟乜差異會咁大呢？

《抓娃娃》上咗四日，連之前的優先播放場次，票房總計只有90萬元，排在電影票房榜的第八位，點講都令人相當失望。一套雷霆萬鈞電影，點解被香港觀眾冷對待呢？為乜差異咁大呢？

我當然有入場睇，發覺觀眾大致分兩類，頭45分鐘有不少笑聲，但也有另一半觀眾默然，對劇情擺明不以為然。《抓娃娃》其實是諷刺現今中國不少由一窮二白捱起的大富豪（若你認識真實情況，當知大部分身家10億元計的富豪，絕非「捱」出來咁簡單），用盡各種方法催谷下一代，希望佢哋似自己，同樣變「成功人物」。

戲中的一對夫婦，就是用上扮窮來令兒子過著上世紀的艱苦生活。呢個「扮」，即由最根本一切，包括衣食住行全造假局，令兒子信自己家中人人困苦，必須生性一齊捱之外，更要再苦讀。

電影的笑料，就是從望子成龍的假布局中擠出來，事實，內地人可能有同感，但相信不少香港觀眾，則覺是硬滑稽，唔Buy。

坐在我後邊的一對夫婦是佼佼者，睇咗45分鐘後，男的細細聲話：「認真多鬼餘，走啦老婆。」

小弟屬於邊類？睇咗幾耐？不必透露了。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。